ކޮޅުފުށީގައި އިމާރާތްކޮށްފައިވާ 100 ހައުސިން ޔުނިޓް މި އަހަރުގެ ނިޔަލަށް ރައްޔިތުންނަށް ހަވާލުކުރައްވާނެ ކަމަށާއި، އަދި އަންނަ އަހަރުގެ ބަޖެޓުގައި ހިމަނައިގެން އިތުރު 100 ހައުސިން ޔުނިޓް ތަރައްޤީކޮށްދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށުގެ ރައްޔިތުންނަށް ދެއްވައިފިއެވެ.

ކޮޅުފުށްޓަށް ކުރެއްވި ދަތުރުފުޅުގައި އެރަށުގެ ރައްޔިތުންނާއި ބައްދަލުކުރައްވައި ރައީސުލްޖުމްހޫރިއްޔާ ވަނީ، ރައްޔިތުންނަށް ދިމާވެފައިވާ ދަތިތަކާއި ކަންބޮޑުވުންތައް ސީދާ ރައީސްއަށް ހުށަހެޅުމުގެ ފުރުޞަތު ދެއްވާފައެވެ. އަދި

ކޮޅުފުށީގެ ތަރައްޤީއާއި ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މިހާރު ތަރައްޤީކޮށްފައިވާ ހައުސިން ޔުނިޓްތަކަށް ޔުޓިލިޓީ ޚިދުމަތްތައް ފޯރުކޮށްދިނުމުގެ މަސައްކަތް ފެނަކަ އާއި ހަވާލުކުރެވިފައިވާ ކަމަށާއި، އެ މަސައްކަތް މި އަހަރުގެ ނިޔަލަށް ނިންމައި، ވީހާވެސް އަވަހަށް މީހުންނަށް ވަދެވޭނެ އިންތިޒާމް ހަމަޖައްސަވާނެ ކަމަށެވެ.

މީގެ އިތުރުން، ޚާއްޞަ އިސްކަމެއް ދެއްވައި، އެ ރަށުގައި ތަރައްޤީކުރާ ހައުސިން ޔުނިޓްތަކުގެ މަހު ކުލީގެ އަގު 5000 ރުފިޔާއިން 3333 ރުފިޔާއަށް ކުޑަކޮށްދެއްވާފައިވާ ކަމަށް ވެސް ރައީސް މުޢިއްޒު ވަނީ ހާމަކުރައްވާފައެވެ.

"މިރަށަށް ގެދޮރުވެރިކަމުގެ އިތުރު މަސައްކަތްތައް ބޭނުންވޭ. އަންނަ އަހަރުގެ ބަޖެޓުގައި ހިމަނައިގެން 100 ހައުސިން ޔުނިޓް މިރަށުގައި ފަށާނެކަމުގެ ޔަގީންކަން ރައްޔިތުންނަށް ދެން. އަމިއްލަ ގޯތީގަ މި މަޝްރޫއުގެ ދަށުން އަޅަން ބޭނުންވާ މީހުންނަށްވެސް އެ ފުރުޞަތު ދޭނަން،" ރައީސް ވިދާޅުވިއެވެ.

ކޮޅުފުށިގެ މަގުތައް ތާރުއަޅައި ޒަމާނީ ފެންވަރަށް ތަރައްޤީކުރުމަށް ފެށި މަޝްރޫޢުއަކީ އެ ރަށުގެ ޢުމްރާނީ ތަރައްޤީ އަށާއި، އިޤްތިޞާދަށް މުހިންމު މަސައްކަތެއް ކަމަށް ރައީސް ފާހަގަކުރެއްވިއެވެ. މީގެއިތުރުން، އެ ރަށުގެ ކަރަންޓުގެ މައްސަލަ ޙައްލުކުރުމަށް އިތުރު ޖަނަރޭޓަރު ސެޓެއް ގެނެސްދެއްވާނެ ކަމަށާއި، ސްކޫލްގައި ލައިބްރަރީ އާއި ހެލްތް ރޫމް ހިމެނޭހެން އިތުރު ފެސިލިޓީތައް ޤާއިމުކޮށްދެއްވާނެކަމުގެ ޔަގީންކަންވެސް ރައީސް ދެއްވިއެވެ.

މި ދަތުރުފުޅުގެ ތެރެއިން ކޮޅުފުށީ ރައްޔިތުން ވަނީ އެ ރަށް ހިމެނޭ ސަރަޙައްދުގައި ހުއްޓިފައިވާ ޓުއަރިޒަމް މަޝްރޫޢުތައް އަވަސްކޮށްދިނުމަށް އެދިފައެވެ. ރައީސް ވަނީ އެކަމާއި ގުޅޭ އެގްރިމަންޓްތައް ބައްލަވައި، ވީހާވެސް އަވަހަށް މައްސަލަ ޙައްލުކޮށްދެއްވުމަށް މަސައްކަތް ކޮށްދެއްވާނެ ކަމަށް ވިދާޅުވެފައެވެ. އަދި އެ ރަށުގައި ފުޓުބޯޅަ ދަނޑާއި، ހޭންޑްބޯލް ކޯޓެއްވެސް ތަރައްޤީކޮށްދެއްވާނެ ކަމަށް ރައީސް ވިދާޅުވިއެވެ.

މީގެ އިތުރުން، އެ ރަށުގެ ރައްޔިތުން ވަނީ ރަށުގައި ތިބެގެން މަތީ ތަޢުލީމަށް ކިޔެވޭނެ ފަސޭހަ ފުރުޞަތުތައް ހޯދަދިނުމަށްވެސް ރައީސް އަރިހުގައި އެދިފައެވެ. ރައީސް ވަނީ މިކަމަށް ޙައްލެއް ހޯދުމަށް ސަރުކާރުގެ ކަމާގުޅޭ އިދާރާތަކާއެކު މަޝްވަރާކޮށް ޙައްލެއް ހޯދައިދިނުމުގެ މަސައްކަތް މިހާރުވެސް ކުރިއަށްދާކަމަށް ވިދާޅުވެފައެވެ.