ރިޔާސީ އިންތިހާބުގައި ވައުދުފުޅުވީ ގޮތަށް މަސް ގަންނަ އަގު 20 ރުފިޔާއަށް ބަދަލުކޮށްދެއްވާނެ ކަމަށާއި، އެހެނަސް އެކަމަށް ވަގުތު ނަގާފާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މި މޭރުމުން ވިދާޅުވެފައިވަނީ، އެމަނިކުފާނު މިހާރު މ. އަތޮޅުގެ މީހުން ދިރިއުޅޭ ރަށްރަށް ކުރައްވަމުން ގެންދަވާ ދަތުރުފުޅުގެ ތެރެއިން، އެ އަތޮޅު ދިއްގަރަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.
ދިއްގަރަކީ މަސްވެރިކަމުގެ ސިނާއަތުގައި ކުރިއަރާފައިވާ ރަށެއް ކަން ފާހަގަކުރައްވައި ރައީސް ވިދާޅުވީ، ޓޫރިޒަމް ސިނާއަތަށް ފަހު ސަރުކާރުން އެންމެ އިސްކަމެއް ދޭ ސިނާއަތަކީ މަސްވެރިކަމުގެ ސިނާއަތްކަމަށެވެ. މީގެ އިތުރުން، މަސްވެރިކަމުގެ ސިނާއަތް މިހާރަށްވުރެ ބޮޑަށް ކުރިއަރުވައި ހަރުދަނާކުރުމަށް މަސްވެރިންގެ އަޑު ގާތުން އަހައި، އެކަންކަން ހައްލު ކުރެވޭނެ ކަމަށް ރައީސް ވިދާޅުވިއެވެ.
ރިޔާސީ އިންތިހާބުގައި ވައުދުފުޅުވީ ގޮތަށް، މަސްވެރިން ބާނާ މަހުގެ އަގު 20 ރުފިޔާއަށް ވުރެ ދަން ނޫން އަގެއްގައި ވިއްކޭނެ ގޮތް ހަމަޖައްސަވައިދެއްވާނެ ކަމުގެ ޔަގީންކަން ދެއްވަމުން ރައީސް ވިދާޅުވެފައިވަނީ އެކަން ތަންފީޒު ކުރުމަށް މިނިސްޓްރީއާއި، ކަމާބެހޭ ފަރާތްތަކާއި އަދި މިފްކޯއާއިއެކު މަޝްވަރާ ކުރައްވަމުން ގެންދަވާ ކަމަށެވެ. މީގެ އިތުރުން، އެއްވެސް ޕްލޭނެއް ނެތި ކަންކަމުގައި ގޮތް ނިންމުމަކީ އެންމެ ރަނގަޅު ގޮތް ކަމަށް ދެކިވަޑައިނުގަންނަވާ ކަމަށް އެމަނިކުފާނު ވަނީ ވިދާޅުވެފައެވެ.
"މިވެސް ސަސްޓެނައިބަލްކޮށް، މެދުނުކެނޑި ކުރިއަށްގެންދަން ބޭނުން ކަމެއް، ހަމަ ނަމެއްގައި މާދަން ފެށިގެން 20 ރުފިޔާއޭ ބުނީމަކާ އެކަމެއް ނުވޭ، އިރާދަކުރެއްވިއްޔާ އެކަން ހާސިލްކުރުމަށްޓަކައި މިދަނީ ވަރަށް ގިނަ މަސައްކަތްތަކެއް އިންޑަސްޓްރީ ތެރޭގައި، މިނިސްޓްރީންނާއި މިފްކޯއާއި ކަމާގުޅުން ހުރި ހުރިހާ ފަރާތްކާއި އެކީގައި ސަރުކާރުން ކުރަމުން،" ދިއްގަރު ރައްޔިތުންނާ ބައްދަލުކުރައްވައި ރައީސް ވިދާޅުވިއެވެ.
މަސްވެރިކަމުގެ ސިނާއަތް މިހާރަށްވުރެ ބޮޑަށް ކުރިއަރުވައި ހަރުދަނާ ކުރުމަށްޓަކައި އެކިއެކި މަސައްކަތްތައް ކުރަމުން އަންނަ ކަމަށާއި، އޭގެތެރޭގައި ރާއްޖޭގެ އެކި ސަރަހައްދުތަކުން މަސްވެރިންނަށް އައިސް ލިބޭނެ ގޮތް ފަހިކޮށްދެއްވާނެކަމަށް ރައީސް ވަނީ ވިދާޅުވެފައެވެ.
