ވ. ފެލިދޫގައި އައިޑީކާޑުގެ ހިދުމަތް ގާއިމުވެގެންދިޔުމާއެކު، ރާއްޖޭގެ ހުރިހާ އަތޮޅެއްގައި އައިޑީކާޑުގެ ހިދުމަތް ފެށިގެން ދިޔައީ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މި މޭރުމުން ވިދާޅުވެފައިވަނީ، އެމަނިކުފާނު ވ. އަތޮޅުގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، އެ އަތޮޅު ފެލިދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.

މިރޭގެ ޖަލްސާގައި ފެލިދޫގައި ވަނީ އައިޑީކާޑާއި ޕާސްޕޯޓުގެ ހިދުމަތް ރަސްމީގޮތުން އިފްތިތާހުކުރައްވައިފަ އެވެ. މިއާއެކު، ކަނޑައަޅުއްވާފައިވާ އަމާޒާ އެއްގޮތަށް، މިއަހަރު ނިމުމުގެ ކުރިން ރާއްޖޭގެ ހުރިހާ އަތޮޅެއްގައި އައިޑީކާޑުގެ ހިދުމަތް ވަނީ ފެށިގެންގޮސްފަ އެވެ.

މިފަދަ ހިދުމަތްތައް ލާމަރުކަޒު ކުރެއްވުމުގެ މަގުސަދަށް އަލިއަޅުއްވާލައްވަމުން ރައީސް ޑރ. މުއިއްޒު ވިދާޅުވެފައިވަނީ، މި ސަރުކާރުގެ މަގުސަދަކީ ރައްޔިތުން އަސާސީ ހިދުމަތްތަކަށް މާލެއަށް ބަރޯސާވާން ޖެހޭ ޖެހުން ނިމުމަކަށް ގެނައުން ކަމަށެވެ.

މީގެ އިތުރުން ރަށްރަށުގައި އޭޓީއެމްގެ ހިދުމަތް ފެށުމާ ގުޅުވައިގެން އެމަނިކުފާނަށް މަލާމާތް ރައްދުވަމުންދާކަން އެނގިވަޑައިގަންނަވާކަމަށާއި، އެހެންނަމަވެސް އެފަދަ އަސާސީ ހިދުމަތްތައް މަރުކަޒުވެފައި ހުރުމުން ރައްޔިތުން އުފުލަންޖެހުނު ތަކުލީފާއި، އެ ހިދުމަތްތައް ލާމަރުކަޒުކުރުމުން ލިބޭ ލުއިފަސޭހަކަން އެނގިވަޑައިގަންނަވާކަމަށް އެމަނިކުފާނު ވަނީ ވިދާޅުވެފަ އެވެ.

ރައްޔިތުންނަށް މި ފަދަ ހިދުމަތްތައް ފޯރުކޮށްދިނުމަކީ ލިބިވަޑައިގަންނަވާ ފަހުރެއްކަމަށް ރައީސް ވަނީ ވިދާޅުވެފަ އެވެ.