ގާނޫނު މުގުރައި، ގާނޫނާ ހިލާފަށް ކަންކުރަން މި ގައުމުގައި އެއްވެސް ބަޔަކަށް ފުރުސަތު ނުދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މި މޭރުމުން ވިދާޅުވެފައިވަނީ، އެމަނިކުފާނު މިހާރު، ވ. އަތޮޅުގެ މީހުން ދިރިއުޅޭ ރަށްރަށަށް ކުރައްވަމުން ގެންދަވާ ދަތުރުފުޅުގައި، އެ އަތޮޅު ފެލިދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ. ރާއްޖޭގެ ރިޔާސަތާ އެމަނިކުފާނު ހަވާލުވެޑައިގަތީ ގާނޫނު ނެގެހެއްޓެވުމަށްކަން ފާހަގަކުރައްވައި ރައީސް ވިދާޅުވީ، ގާނޫނުގެ ވެރިކަމުގެ ކުރިމަތީގައި ހުރިހާ ރައްޔިތުން ހަމަހަމަވާނެ ކަމަށެވެ.
ތެދުބަހުން ވާހަކަދައްކައި، ކަންކަމުގެ ހަގީގަތް ރައްޔިތުންނަށް ގެނެސްދިނުމުގެ މިނިވަންކަން، ސިޔާސީ ފަރާތްތަކާއި، ނޫސްވެރިންނާއި އަދި ރައްޔިތުންނަށްވެސް، އެއްވެސް ހިފެހެއްޓުމެއް ނެތި އޮތްކަމަށް ރައީސް ވަނީ ވިދާޅުވެފަ އެވެ. އަދި އަލަށް ފާސްކުރެވުނު މީޑިއާ ގާނޫނުން ވެސް އަންގަނީ، ސާބިތު ނުހިފޭ ވާހަކަ ނުދެއްކުމަށްކަމަށާއި، ސާބިތު ނުހިފޭ ވާހަކައެއްނަމަ އެއީ ސާބިތު ނުހިފޭ ވާހަކައެއްކަން ހާމަކުރުމަށްކަމަށް އެމަނިކުފާނު ވިދާޅުވި އެވެ.
Advertisement
"ވޭތުވެގެންދިޔަ ދެ އަހަރެއްހައި ދުވަހުގެ ތެރޭގައި އެއްވެސް ރައްޔިތަކަށް ފެނިވަޑައިގެންފައި ނޯންނާނެ ސިޔާސީ ބޭނުމެއްގައި އެއްވެސް ފަރާތަކާ ދޭތެރޭގައި މި ސަރުކާރުން ފިޔަވަޅެއް އަޅައިފަ އޮތް ތަނެއް. ބަދަލެއް ހިފި ތަނެއް. އެހެންތޯ ކުރިން އޮތީ؟ ގައުމުގައި ހަމަނުޖެހުން ތާއަބަދު ތަކުރާރުވަމުން ސައިކަލްއެއްގޮތުގައި ދިޔައީ ތަކުރާރުވަމުން ހަމަޖެހުމެއް ނެތް. މިހާރު މީގެ އެއްވެސް ކަމެއް ނޯންނާނެ."--- ރައީސް ވިދާޅުވި އެވެ.
ސިޔާސީ ފަރާތްތަކުން އެ ފަރާތްތަކުން ސިޔާސީ ގޮތުން ދައްކަން ބޭނުންވާ ވާހަކައެއްދެއްކި ނަމަވެސް މި ސަރުކާރުން ފިޔަވަޅު އަޅާފައިނުވާނެކަމަށާއި، އެ މީހަކީ ސިޔާސީ މީހަކަށްވެގެން ކޯޓަށް ވެސް ގެންގޮސްފައި ނުވާނެކަމަށް ރައީސް ވަނީ ވިދާޅުވެފަ އެވެ.
