މައިންބަފައިންނަށް ހެޔޮކޮށް ހިތުމަކީ އިންސާނާގެ އުމުރުގައި ބަރަކާތްލައްވާނެ ކަމެއް ކަމަށް ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގައި ބުނެފައިވާ ގޮތުގައި، މައިންބަފައިންނަށް ހެޔޮކޮށް ހިތުމަކީ ބާއްޖަވެރިކަމުގެ ތަޅުދަނޑިކަމަށާއި، އަދި ސުވަރުގެއަށް ވަނުމުގެ ތަޅުދަނޑިކަމަށް ވަނީ ބުނެފަ އެވެ. މީގެ އިތުރުން، މައިންބަފައިންގެ ދުއާއަކީ ކޮންމެ ދަރިއަކަށް ވެސް މުހިއްމު ހަތިޔާރެއްކަމަށް ކަމަށް ހުކުރު ހުތުބާގައި ވަނީ ބުނެފަ އެވެ.

މައިންބަފައިންގެ ރުހުން ލިބިއްޖެނަމަ، އެ މީހަކަށް ދިމާވާ އެތައް މުސީބާތަކުން މާތްﷲ އެ މީހަކު ސަލާމަތްކޮށްދެއްވާނެކަމަށް ހުތުބާގައި ވަނީ ބުނެފަ އެވެ. ކަން މިހެން އޮތް ހިނދު، މިކަން ހަނދާންނައްތާލައި، މައިންބަފައިންނަށް ނިކަމެތިކޮށް ހިތައި، އެ މީހުން ހިތުގައި ޖައްސައި، އެ މީހުންނަށް އަޅާނުލައި ދޫކޮށްލާފައިވާ މީހުން މަރުގެ ވޭންވަރުގެ ތެރެއަށް ވެއްޓިގެންދާހިނދު، ސަލާމަތްވާނެ އެއްވެސް ގޮތެއް ނޯންނާނެކަމަށް ހުކުރު ހުތުބާގައި ވަނީ ބުނެފަ އެވެ.

"ތިބާ ކުޑަކުޑައިރު، ނިދިނަގާލައި، ތިބާގެ އުފަލާއި ހިތްހަމަޖެހުމަށްޓަކައި، މަސައްކަތްކޮށް، ތިބާއަށް އުފާވެރިކަން ހޯދައިދިން ލޮބުވެތި މަންމަ އާއި ބައްޕައަށް އެހީތެރިވާށެވެ. މިއަދު އެ ދެމީހުން އެވަނީ މުސްކުޅިވެ ގައިގެ ބާރު ދެރަވެފަ އެވެ. ތިބާގެ އޯގާތެރިކަމާއި، އެހީތެރިކަމަށް ބޭނުންވެފަ އެވެ." ހުކުރު ހުތުބާގައި ބުންޏެވެ.

ހޮސްޕިޓަލުތަކުގައި އަދި ހާއްސަ އެހީއަށް ބޭނުންވާ މީހުންގެ މަރުކަޒުގައި މުސްކުޅި ބަލީގައި އެކަނިވެރި ހާލުގައި، މަންމަ ނުވަތަ ބައްޕަ ދޫކޮށް، އަނބިދަރިންނާއެކު އުފަލުގައި ދިރިއުޅެމުންދާ މީހުން، އެ މީހުންގެ ވިސްނުން ބަދަލުކޮށް އަމަލުތަށް އިސްލާހުކުރުމަށް މިއަދުގެ ހުކުރު ހުތުބާގައި ވަނީ ނަސޭހަތްތެރިވެފަ އެވެ.