މިއަދު ފާސްކުރި މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ބިލު މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ދިރާސާކުރަމުންދަނިކޮށް ކޮމިޓީގައި އަޑުގަދަކޮށް މަޖިލީހުގެ ކަރާމާތް ގެއްލުވާލި ނޫސްވެރިންގެ މައްސަލަ ބަލަން މަޖިލީހުގެ އާއްމު ކޮމިޓީއަށް ފޮނުވަން ނިންމައިފި އެެވެ.

ދައުރުން ބޭރުން މިއަދު ބޭއްވި ޖަލްސާގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ މިނިވަން މުއައްސަސާތަކާ ބެހޭ ކޮމިޓީގެ މަސައްކަތަށް ހުރަސްއެޅޭ ގޮތަށާއި މަޖިލީހުގެ ކަރާމަތަށް އުނިކަން އަންނަ ގޮތަށް އަމަލުކޮށް އިޖުތިމާއީ އަހުލާގުގެ މިންގަނޑުތަކާ ހިލާފު އަމަލުތަކެއް ކޮށްފައިވާތީ މަޖިލީހުގެ ސާޖަންޓް އެޓް އާމްސް ތައްޔާރުކޮށްފައިވާ ރިޕޯޓެއް މަޖިލީހުގެ ރިޔާސަތަށް ލިބިފައިވާ ކަމަށެވެ.

އެއީ މީޑިއާ ބިލު ދިރާސާކުރުމަށް ބޭއްވި ކޮމިޓީ ބައްދަލުވުމެއްގައި ތިބި ބައެއް ނޫސްވެރިން އެކަމާ ދެކޮޅު ހަދައި ކޮމިޓީގައި އަޑުގަދަކުރި މައްސަލަ އެވެ.

ނާޒިމް ވިދާޅުވީ އެ މައްސަލަ ބެލުމަށް މަޖިލީހުގެ އާއްމު ކޮމިޓީއަށް ފޮނުވަން ނިންމާފައިވާ ކަމަށެވެ. އަދި އެގޮތަށް ނިންމީ މަޖިލީހުގެ ކަރާމަތަށް އުނިކަން އަންނަ ގޮތަކަށް އަމަލުކުރުމުގެ ފުރުސަތު ނުދިނުމަށް މަޖިލީހުގެ ގަވާއިދު އިސްލާހުކުރުމަށާއި މަޖިލީހުގެ މެހުމާނުން ގޮތުގައި ހާޒިރުވާ މީހުން އަމަލުކުރާނެ އުސޫލުތަކެއް ކަނޑައަޅާ އެ އުސޫލާއި ހިލާފުވެއްޖެނަމަ އަޅާނެ ފިޔަވަޅުތަކެއްް މަޖިލީހުގެ ގަވާއިދުގައި ބަޔާންކުރުމަށް ދެވޭ އިރުޝާދެއް ކަމަށް ނާޒިމް ވިދާޅުވި އެެވެ.

މީގެ އިތުރުން މިނިވަން މުއައްސަސާތަކުގެ ކޮމިޓީގައި ދެ މެމްބަރެއްގެ ދެމެދުގައި ހިނގި ހަމަނުޖެހުމެއްގައި ކޮމިޓީ ރޫމުގެ މައިކަކަށް މެމްބަރަކު ގެއްލުންދީފައިވާތީ އެ މައްސަލަ މަޖިލީހުގެ ސުލޫކީ ކޮމިޓީއަށް ފޮނުވަން މަޖިލީހުގެ ރިޔާސަތުން ނިންމާފައިވާކަމަށްވެސް ނާޒިމް ވިދާޅުވި އެވެ.