ރައްޔިތުންގެ މަޖިލީހުގެ ދައުރުން ބޭރުން މިއަދު ބޭއްވުމަށް ހަމަޖެހިފައިވާ ހާއްސަ ޖަލްސާ ފަށައި، މީޑިއާ ރެގިއުލޭޝަން ބިލް ފާސްކުރުމާ މެދުގައި ގޮތެއް ނިންމުމުގެ މަސައްކަތް ކުރިއަށްދާ ގެންދަން ފަށައިފި އެވެ. ނަމަވެސް، ޖަލްސާ ފެށި ހިސާބުން، އިދިކޮޅު އެމްޑީޕީގެ ބައެއް މެންބަރުން މަޖިލީހުގެ ތަޅުމުގައި އަޑުގަދަކޮށް، މުޒާހަރާ ކުރަމުންދާތީ، ހަމަނުޖެހުން ބޮޑުވެ، ބައެއް މެންބަރުންގެ ނަން އިއްވާ މިހާރު ވަނީ މަޖިލީހުގެ ތަޅުމުން ނެރެފަ އެވެ.
މަޖިލީހުގެ އެންމެ އިސްކަމެއް ދީގެން މިހާރު ކުރިއަށްދާ އެއް މަސައްކަތަކީ މީޑިއާ ރެގިއުލޭޝަންގެ ބިލާ ގުޅޭ މަސައްކަތެވެ. ތުޅާދޫ ދާއިރާގެ އަމިއްލަ މެންބަރު އަބްދުލް ހަންނާނު އަބޫބަކުރު ހުށަހެޅުއްވި މި ބިލް ދިރާސާ ކުރުމުގެ މަސައްކަތް މިނިވަން މުއައްސަސާތަކުގެ ކޮމިޓީން އިއްޔެ ވަނީ ފާސްކޮށްފަ އެވެ.
މިއަދުގެ ޖަލްސާގައި މި ބިލާ ގުޅޭގޮތުން މަޖިލީހުގެ ކައުންސިލަރު ޖެނެރަލް ފާތިމަތު ފިލްޒާ ވިދާޅުވީ، މީޑިއާ ރެގިއުލޭޝަން ބިލުގައި ގާނޫނު އަސާސީ އާ ތައާރަޒުވާ އެއްވެސް ކަމެއް ނެތް ކަމަށާއި އަދި ގާނޫން އަސާސީން ލިބިދީފައިވާ އެއްވެސް ހައްގަކަށް އުނިކަން ނާންނާނެ ކަމަށެވެ. އެހެންކަމުން، ދެން އޮންނާނީ މި ބިލާ ގުޅޭ ކޮމިޓީ ރިޕޯޓު މަޖިލިހުގެ ތަޅުމަށް ހުށަހަޅާ، އެ ބިލް ފާސްކުރުމަށް ވޯޓަށް އެހުމުގެ މަރުހަލާ އެވެ.
އެމްޑީޕީ މެންބަރުންގެ މި އަޑުގަދަ ކުރުމާއި މުޒާހަރާގެ ސަބަބުން، ޖަލްސާގެ ކަންކަން ކުރިއަށް ގެންދިއުމަށް ދަތިތަކެއް ކުރިމަތިވެފައިވާ ކަމަށް މަޖިލީހުން މައުލޫމާތު ލިބެ އެވެ. މި ބިލް ފާސްކުރުމުގެ މަސައްކަތް ކުރިއަށްދާއިރު، ސިޔާސީ ހޫނުކަން ވަނީ އިންތިހާއަށް ގަދަވެފަ އެވެ.
