މަޖިލީހުގެ މިނިވަން މުއައްސަސާތަކުގެ ކޮމިޓީން އިއްޔެ ފާސްކުރި މީޑިއާ ރެގިއުލޭޝަން ބިލުގައި ދިވެހިރާއްޖޭގެ ޤާނޫނު އަސާސީއާ ފުށުއެރާ އެއްވެސް ކަމެއް ނެތް ކަމަށާއި އަދި މި ބިލަކީ ޤާނޫނު އަސާސީން ރައްޔިތުންނަށް ލިބިދީފައިވާ އެއްވެސް ހައްގަކަށް އުނިކަމެއް ނާންނާނެ ގޮތަށް އެކުލަވާލާފައިވާ ބިލެއް ކަމަށް ރައްޔިތުންގެ މަޖިލީހުގެ ކައުންސިލަރު ޖެނެރަލް ފާތިމަތު ފިލްޒާ ވިދާޅުވެއްޖެ އެވެ. މި ބިލު މިއަދު ހަވީރު އޮންނަ ރައްޔިތުންގެ މަޖިލީހުގެ ޖަލްސާގައި ފާސްވެގެންދާނެ ކަމަށް ލަފާކުރެވެއެވެ.
އިއްޔެ ކޮމިޓީން ފުރަތަމަ ބިލް ފާސްކުރި ނަމަވެސް، ބިލުގެ މަސައްކަތް އަލުން ކުރިއަށް ގެންދިއުމަށްޓަކައި މިއަދު މެންދުރު ފަހު ކޮމިޓީގެ އިތުރު ބައްދަލުވުމެއް ވަނީ ބާއްވާފަ އެވެ. މި ބައްދަލުވުމުގައި ވެސް ފިލްޒާ ތަކުރާރުކޮށް ވިދާޅުވީ ބިލުގައި ޤާނޫނު އަސާސީއާ ތައާރަޒުވާ އެއްވެސް މާއްދާއެއް ނުހިމެނޭ ކަމަށާއި، ރައްޔިތުންނަށް ލިބިފައިވާ ހައްގުތަކަށް އެއްވެސް އުނިކަމެއް ނާންނާނެ ކަމަށެވެ. މީޑިއާ ރެގިއުލޭޝަން ބިލަކީ މިވަގުތު ރައްޔިތުންގެ މަޖިލީހުގައި އެންމެ މުހިންމުކަމެއް ދީގެން ކުރިއަށް ގެންދާ އެއް މަސައްކަތެވެ.
އެގޮތުް، މި ބިލަކީ ތުޅާދޫ ދާއިރާގެ އަމިއްލަ މެންބަރު އަބްދުލް ހަންނާނު އަބޫބަކުރު ރައްޔިތުންގެ މަޖިލީހަށް ހުށަހެޅުއްވި ބިލެކެވެ. ބިލު ހުށަހެޅުނު ފުރަތަމަ ގޮތުގައި، ބައެއް ނޫސްވެރިން ވަނީ ބިލުގެ ސަބަބުން ނޫސްވެރިކަން ކުރުމަށް ގިނަ ހުރަސްތަކެއް ކުރިމަތިވާނެ ކަމަށް ކަންބޮޑުވުން ފާޅުކޮށްފަ އެވެ. ނަމަވެސް، ބަންޑާރަ ނައިބުގެ އޮފީހުން ހުށަހެޅުނު އިސްލާހުތަކާ އެކު، ބިލަށް ބޮޑެތި ބަދަލުތަކެއް އަންނާނެ ކަމަށް ސަރުކާރުން ގަބޫލުކުރެ އެވެ.
މި ބިލަށް ގެނެވުނު މުހިންމު އެއް ބަދަލަކީ މީޑިއާ ކޮމިޝަނަށް މެމްބަރުން އައްޔަން ކުރުމުގެ އުސޫލަށް ގެނައި ބަދަލެވެ. ކުރިން، ކޮމިޝަނަށް އައްޔަން ކުރާ މެމްބަރުންގެ ތެރެއިން ތިން މެމްބަރުން އައްޔަން ކުރުމުގެ ބާރު ރައީސުލްޖުމްހޫރިއްޔާއަށް ލިބިފައި އޮތެވެ. ނަމަވެސް، މިހާރު ގެނައި އިސްލާހާ އެކު، މި ތިން މެމްބަރުން އައްޔަން ކުރާނީ ރައްޔިތުންގެ މަޖިލިހުންނެވެ. ބާކީ ތިބި ހަތަރު މެމްބަރުން އައްޔަން ކުރާނީ މީޑިއާތަކުން ކަމަށް ބިލުގައި ބަޔާންކޮށްފައިވެ އެވެ.
މީގެ އިތުރުން، ވަކިވަކި ނޫސްވެރިންނާ ދެކޮޅަށް ފިޔަވަޅު އަޅާ ގޮތަށް އޮތް ބައި ވަނީ ކޮމިޓީން އުނިކޮށްފަ އެވެ. އަދި މީސް މީޑިއާ (ފޭސްބުކް، އެކްސް ފަދަ ޕްލެޓްފޯމްތައް) ބޭނުންކުރާ ނުވަތަ ކޮންޓެންޓް އުފައްދާ ފަރާތްތަކަށް ވެސް މި ބިލު ހިނގާނެ ކަމަށް ބުނާ މާއްދާތައް ވެސް ބިލުން ވަނީ ވަކިކޮށްފަ އެވެ.
