ޣައްޒާ އާއި ދެކޮޅަށް ކުރަމުންދާ ހަނގުރާމައިގެ ތެރޭގައި އިސްރާއީލާއި ޔަމަނުގެ ހޫޘީންނާއި ދެމެދު ހަމަނުޖެހުންތައް އިތުރުވަމުންދާތީވެ އެކަން ހުއްޓުވުމަށް ޔުނައިޓެޑް ނޭޝަންސް (އ.ދ) އިން ޔަމަނަށް ކަނޑައަޅާފައިވާ ޚާއްޞަ މަންދޫބު ހަންސް ގްރަންޑްބަރގް ގޮވައިލައިފިއެވެ.

އދ. ގެ ސަލާމަތާއި ބެހޭ ކައުންސިލްގައި ވަހަކަ ދައްކަވަމުން އޭނާ ވިދާޅުވީ ޔަމަނާއި އިސްރާއީލާއި ދެމެދު ހިނގަމުންދާ ހަމަނުޖެހުންތައް ވަރުގަދަވެ ދެފަރާތަށް ވެސް ލިބެމުންދާ ގެއްލުން ބޮޑުވަމުންދާ މަންޒަރު ފެންނަމުންދާ ކަމަށެވެ.

"އަޅުގަނޑުމެންނަށް ފެންނަނީ އަންސާރުالله އާއި އިސްރާއީލާ ދެމެދު އުފެދިފައިވާ ޢަދާވާތްތެރިކަން ބިރުވެރި އަދި ނުރައްކާތެރި ގޮތެއްގައި ވަރުގަދަވަމުންދާތަން،" ހޫތީންނަށް ރަސްމީ ނަމުން އިޝާރާތް ކުރައްވައި އޭނާ ވިދާޅުވި އެވެ.

ހަންސް ގްރަންޑްބަރގް އަކީ ސްވިޑެންގެ ޑިޕްލޮމެޓެކެވެ. މެދުއިރުމަތީގެ ކަންކަމުގައި މީގެ ކުރިން މިޞްރާއި ފަލަސްޠީނުގައި އޭނާ މަސައްކްތް ކުރެއްވިއިރު ޔޫރަޕިއަން ޔޫނިއަންގެ މިޝަންތަކުގެ އިތުރުން، ގަލްފާއި މެދުއިރުމައްޗާއި ގުޅުން ހުރި އީޔޫގެ ވޯކިން ގްރޫޕްތަކުގެ ޗެއާމަންކަން ވެސް އޭނާ ކުރެއްވި ކަން ފާހަގަ ކުރެވެއެވެ.

އޭނާފާހަގަ ކުރެއްވި ގޮތުގައި ޔަމަނުގެ ހޫޘީ ޑްރޯންތަކާއި މިސައިލްތަކުން އިސްރާއީލަށް ބޮޑެތި ގެއްލުންތައް ލިބިފައިވެއެވެ. އެއާޕޯޓާއި ޢާންމުންނަށް ވެސް ގެއްލުން ލިބިފައިވެއެވެ. އަނެއްކޮޅުން ބަލާއިރު އޮގަސްޓް އަދި ސެޕްޓެމްބަރު މަހު އިސްރާއީލުން ޔަމަނަށް ދިން ޙަމަލާތަކުގައި ހޫޘީންގެ ކެބިނެޓުގެ ވަޒީރުންނާއި ގިނަ ޢަދަދެއްގެ ޢާންމުން ޝަހީދުވި ކަމަށް ފާހަގަކުރެއްވިއެވެ. އެހެންކަމުން މި ބަދަލުހިފުންތައް ނިންމަންޖެހޭ ކަމަށް އޭނާ ވިދާޅުވިއެވެ.

މީގެ އިތުރުން ސަންޢާ ހިމެނޭ ސަރަޙައްދުތަކުގައި އ.ދ. ގެ 44 މުވައްޒަފުން ބަންދުގައި ތިބި ކަމަށް ފާހަގަ ކުރައްވައި ވިދާޅުވީ، ޔަމަނާއި އިސްރާއީލާއި ދެމެދު ޙަމަލާ ބަދަލުކުރުން ކުރިޔަށްދާހާ ހިނދަކު އ.ދ. ގެ ޑިޕްލޮމެޓުންނަށް ވެސް ޔަމަނުގައި ދަތި ވާނެ ކަމަށެވެ.