ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު ކުރުކުރުމުން 70 މިލިއަން ރުފިޔާ ސަލާމަތް ކުރެވިގެންދާނެ ކަމަށް އިނގުރައިދޫ ދާއިރާގެ މެންބަރު އިބްރާހީމް ފަލާހު ވިދާޅުވެއްޖެ އެވެ.
މެންބަރު ފަލާހު މިމޭރުމުން ވިދާޅުވެފައިވަނީ ރައްޔިތުންގެ މަޖިލީހަށް މިހާރު ހުށަހަޅާފައިވާ ރައްޔިތުންގެ ހިޔާލު ހޯދުމުގެ ބިލަށް މިއަދުގެ ޖަލްސާގައި ވާހަކަދައްކަވަމުންނެވެ. ރައްޔިތުންގެ ހިޔާލު ހޯދުމުގެ ބިލަކީ ވަރަށް މުހިއްމު ބިލެއް ކަމަށް ފަލާހު ވަނީ ފާހަގަކުރައްވައިފަ އެވެ.
އެމްޑީޕީގެ ފަރާތުން މި ބިލާ ގުޅޭގޮތުން ވާހަކަދެއްކެވި މެންބަރުން ވާހަކަދެއްކެވިއިރު، ބިލު ދިރާސާކުރައްވާފައި ނެތްކަމަށާއި، އިދިކޮޅުގެ މެންބަރުންނަށް މި ބިލަށް ވޯޓް ނުދޭނެ ސަބަބެއް ވެސް ބަޔާންކޮށްދެވިފައިނުވާ ކަމަށް މެންބަރު ފަލާހު ވަނީ ވިދާޅުވެފަ އެވެ.
"މި ބިލު އޮތް ގޮތުން ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު މިހާރު ބާއްވަން އޮތް މުއްދަތަށްވުރެ މިކުރަނީ ކުރު. ކުރު ކުރުމުގެ ސަބަބުން ދައުލަތުގެ ބަޖެޓުން 70 މިލިއަން ރުފިޔާ ސަލާމަތް ކުރެވިގެންދާނެ" --- މެންބަރު ފަލާހު ވިދާޅުވި އެވެ.
މަޖިލީހުގެ ބައެއް މެންބަރުން އޮޅުވާލަން އުޅުނު ނަމަވެސް ރައްޔިތުންނަކަށް އޮޅުވާނުލެވޭނެ ކަމަށާއި، ރައްޔިތުން އެއަށްވުރެ ހޭލުންތެރިކަމަށް ވެސް މެންބަރު ފަލާހު ވިދާޅުވި އެވެ.
ރައްޔިތުންގެ ހިޔާލު ހޯދުމުގެ ބިލާ ގުޅޭ ގޮތުން އިދިކޮޅަށް ނިސްބަތްވާ ބައެއް މެންބަރުން ހަގީގަތާ ހިލާފު ވާހަކަ ދައްކަމުން އަންނަކަން ފާހަގަކޮށްލެވެ އެވެ. އެގޮތުން ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު ދަންމާލަން ސަރުކާރުން ނިންމާފައިވާކަމަށް އިދިކޮޅަށް ނިސްބަތްވާ މެންބަރުން އަންނަނީ ބުނަމުންނެވެ.
