ފަތުުރުވެރިކަމުގެ ދާއިރާގައި އައްޑޫ ސިޓީ ފަހަތައް ސޮއްސާލުމުގެ އަސްލަކީ އެ ސިޓީގެ ރައްޔިތުންނަށް އަމަލީގޮތުން ކަންކަންކުރަން ނުކެރުން ކަމަށް ރާއްޖޭގެ އެންމެ ބޮޑު އެއް ޓުއާ އޭޖެންސީ، "އިނަ މޯލްޑިވްސް“ގެ ވެރިޔާ މުހައްމަދު ފިރާގު ވިދާޅުވެއްޖެ އެވެ.

އެކި އެކި ސަރުކާރުތަކުން އައްޑޫ ސިޓީގައި ފަތުރުވެރިކަން ފައްކާކުރުމަށް އެކިވަރުގެ އިންވެސްޓުތައް ކޮށް އެކަމާއި ގުޅުންހުރި އެކި އެކި މަޝްރޫއުތައް ކުރިއަށްގެންދިޔަ ނަމަވެސް ފަތުރުވެރިކަމުގެ ދާއިރާއިން އެސިޓީ ކުރިނޭރުމުގެ ކަންބޮޑުވުން އާއްމުންނާއި ދާއިރާގެ ކަމުވޮށިގެންވާ ފަރާތްތަކުންވެސް ދަނީ ފާޅުކުރަމުންނެވެ.

ރާއްޖޭގައި އެފަދަ ދެވަނައެއް ނެތްފަދަ ޑައިވް ޕޮއިންޓަކާއި ގުދުރަތީ އެތައް ރީތިކަމެއް ފުވައްމުލަކަށް ލިބިގެންވާއިރު ސަރުކާރުތަކުން އެ ސިޓީއަށްވުރެ ބޮޑަށް އައްޑޫ ސިޓީގައި ފަތުރުވެރިކަން ތަރައްގީކުރުމަށް ކުރަމުންދާ އިންވެސްޓުތަކަކީ ބޭކާރު އިންވެސްޓުމަންޓުތައް ކަމަށް ބައެއް ފަރާތްތަކުން ދަނީ ބުނަމުންނެވެ. އައްޑޫ ސިޓީއަށް ސަރުކާރުތަކުން މިލިއަނުން ހަރަދުކުރިނަމަވެސް ޖެހިގެން އޮތް ފުވައްމުލައް ސިޓީގައި ފަތުރުވެރިކަން މާބޮޑަށްވެސް ކުރިއަރާފައިވާއިރު ފުވައްމުލައް ސިޓީގައި އެ ދާއިރާ ކުރިއަރުވައި ތަރައްގީކުރަން ގިނަ މަސައްކަތްތަކެއް ސިޓީގެ ރައްޔިތުން ދަނީ ކުރަމުންނެވެ.

މިކަންބޮޑުވުންތަކާއި ގުޅިގެން ސޯޝަލްމީޑިއާގައި ކުރިއަށްގެންދިޔަ ޑިސްކަޝަންއެއްގައި ވާހަކަދައްކަމުން ފިރާގު ވިދާޅުވީ އިރެެއްގައި ފަތުރުވެރިކަމުގެ ދާއިރާގައި އައްޑޫގެ ނަން އިވުނަސް މިއަދު ހާލަތު ބަދަލުވެފައިވާ ކަމަށާއި ރިސޯޓުތަކުގައި އުޅޭ މުވައްޒަފުންނަށް ބަލާއިރުވެސް އައްޑޫގެ ޒުވާނުންގެ އަދަދު މިހާރު ދަށްކަމަށެވެ.

"އަޅުގަނޑުމެންނަށް އެކްސްޕާޓުންގެ ގޮތުގަ ދެން އަބަދުވެސް އައްޑޫގެ ޓޫރިޒަމްގެ ވާހަކަ ނޫނީ އައްޑޫގެ މީހުން ޓޫރިޒަމަށް ކުރި ހޭދައާއި ނޫނޫ ކުރި މަސައްކަތުގެ ވާހަކަ (އިވެނީ). އެހެންމަވެސް ބައްލަވާ ޖެހިގެން އޮތް ފުވަމުލައް. ބެޑަށް ބެލިޔަސް ގިނަ، ސާވިސްއަށް ބެލިޔަސް ރަނގަޅު،" ފިރާގު ވިދާޅުވި އެވެ.

އޭނާ ވިދާޅުވީ އައްޑޫ ސިޓީގެ މީހުން މާބޮޑަށް އިނގިރޭސިވެފައި ތިއްބާ އެހެން އަތޮޅުތަކުގެ މީހުން މިހާރު މާބޮޑަށްވެސް މައްޗަށް ޖެހިލައިފި ކަމަށެވެ. އަދި އައްޑޫ މީހުން އަބަދުވެސް ގޮތްކިޔާނެ ކަމަށާއި ކަމެއް ކުރަންވާއިރު ނުތިބޭނެ ކަމަށްވެސް ވިދާޅުވި އެވެ.

"އަބަދުވެސް ވަރަށް މޮޅެތި އައިޑިއާތައް، ވަރަށް ރަނގަޅު ގޮތްތަށް ކިޔައިދޭނެ. އެހެންނަމަވެސް އަމަލީގޮތުން ނުފެންނާނެ އެއްވެސް ކަމެއް. އަބަދުވެސް އަނގަ ހިފަހައްޓާނެ،" ފިރާގު ވިދާޅުވި އެވެ.