ސަރުކާރުން ސްކައުޓް އެސޯސިއޭޝަނަށް އެހީތެރި ނުވާކަމަށް ބުނެ ފާޑުކިޔަމުންދާތީ އެ އެސޯސިއޭޝަނުން އެކަމަށް ރައްދުދީފި އެވެ. މިކަމާ ގުޅިގެން ސްކައުޓް އެސޯސިއޭޝަނުން ބުނެފައިވާ ގޮތުގައި، އެ އެސޯސިއޭޝަންގެ އިދާރާ ބަދަލުކުރަން ޖެހިއްޖެ ކޮންމެ ހާލަތެއްގައި ވެސް އެޑިއުކޭޝަން މިނިސްޓްރީން އެހީތެރިކަން ފޯރުކޮށްދޭ ކަމަށެވެ.

ސްކައުޓް އެސޯސިއޭޝަނުން މި މޭރުމުން ބުނެފައިވަނީ އިއްޔެ ނެރުނު ނޫސްބަޔާނެއްގަ އެވެ. ސްކައުޓް އެސޯސިއޭޝަނުން ނެރެފައިވާ ބަޔާނުގައި ބުނެފައިވާ ގޮތުގައި، ރާއްޖޭގެ ސްކައުޓް ޖަމިއްޔާއަކީ އެންމެ ކުރިންވެސް، ދާއިމީ އިމާރާތެއްގެ ދަތިކަން ކުރިމަތިވެފައިވާ ޖަމިއްޔާއެކެވެ.

ސްކައުޓް ޖަމިއްޔާއަކީ ނޮން-ފޯމަލް އެޑިއުކޭޝަން ފޯރުކޮށްދިނުމުގެ ތެރެއިން، ތައުލީމީ ނިޒާމަށް އިތުރު ފުރިހަމަ ކަމެއް ގެނެސް ދިނުމުގައި މުހިންމު ދައުރެއް އަދާކުރާ ޖަމުއިއްޔާއެއް ކަމުގައިވާތީ، އެ ޖަމުއިއްޔާ ހިންގަމުން އަންނަނީ އެޑިއުކޭޝަން މިނިސްޓްރީން ހަމަޖައްސާ ދީފައިވާ ތަންތަނުގައި ކަމަށް ސްކައުޓް އެސޯސިއޭޝަނުން ވަނީ ބުނެފަ އެވެ.

އެގޮތުން އެޑިޔުކޭޝަން މިނިސްޓްރީން މިވަގުތު ސްކައުޓް އެސޯސިއޭޝަންގެ އިދާރާއަކަށް ހަމަޖައްސަވައިދެއްވާފައިވަނީ ޗާންދަނީމަގުގައި ހުންނަ އަރަބިއްޔާ ސްކޫލުގެ ކުރީގެ އިމާރާތުގައިކަން ފާހަގަކުރަމުން ސްކައުޓް އެސޯސިއޭޝަނުން ބުނެފައިވަނީ، އެ އިމާރާތް ބާވެ ހަލާކުވެފައިވާތީ މިމަހުގެ 10ވަނަ ދުވަހުގެ ކުރިން، އެ އިމާރާތުން އެ ޖަމިއްޔާއަށް ލިބިފައިވާ ބައިން ނުކުތުމަށް އެޑިއުކޭޝަން މިނިސްޓްރީން އަންގާފައިވާ ކަމަށެވެ.

އެހެންކަމުން މިމަހުގެ ހަތްވަނަ ދުވަހުން ފެށިގެން އެ އިމާރާތުގައި ހިންގަމުން އަންނަ އެ ޖަމިއްޔާގެ ފިހާރަ ވަގުތީ ގޮތުން ބަންދުކުރެވިފައިވާ ކަމަށް ވެސް ސްކައުޓް އެސޯސިއޭޝަނުން ވަނީ ބުނެފަ އެވެ. ސްކައުޓް އެސޯސިއޭޝަނުން ބުނެފައިވާ ގޮތުގައި، އެ ޖަމިއްޔާގެ އިދާރާއާއި ފިހާރަ ހިންގުމަށް އިތުރު ތަނެއް މިވަގުތު ހަމަޖެހިފައި ނުވިނަމަވެސް އެ ޖަމިއްޔާއަށް އިތުރު ތަނެއް ހަމަޖައްސައިދިނުމަށް އެޑިއުކޭޝަން މިނިސްޓްރީން އަންނަނީ މަސައްކަތްކުރަމުންނެވެ.

ސްކައުޓް އެސޯސިއޭޝަނުން ވަނީ، އެޑިއުކޭޝަން މިނިސްޓްރީން އެ ޖަމިއްޔާއަށް ދެމުން އަންނަ އެއްބާރުލުމަށް ޝުކުރުއަދާ ކޮށްފަ އެވެ.