ބިރުވެތިކަމާއި ހުޝޫއަތްތެރިކަމާއެކު ނަމާދުގެ އަޅުކަން އަދާކުރާ މީހުން، ނުބައި ކަންތައްތަކާއި، މުންކަރާތްތަކާއި، ފާފަވެރިވާ ކަންކަމުން ރައްކާތެރިކޮށްދޭނެ ކަމަށް މިއަދުގެ ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގައި ބުނެފައިވާ ގޮތުގައި، އީމާންވުމަށް ފަހު ކޮންމެ އިންސާނެއްގެ މައްޗަށް ވެސް އެންމެ މުހިންމު އަޅުކަމަކީ ނާމާދެވެ. ގިޔާމަތް ދުވަހުން އެންމެ ފުރުތަމަ ހިސާބު ބެއްލެވޭނީ ނަމާދާ މެދުގައި ކަން ފާހަގަކުރަމުން ހުތުބާގައި ބުނެފައިވަނީ، ނަމާދާ ނުލައި ކުރާ އެހެނިހެން އަމަލުތައް މާތްﷲ ގަބޫލުނުކުރައްވާނެ ކަމަށެވެ.

މުސްލިމުން ނަމާދުގެ އަޅުކަން އަދާކުރަންޖެހޭނީ، ސާފުތާހިރު ކަންމަތީހުރެ، ދެއްކުންތެރިކަމެއް ނެތި، މަޑުމައިތިރިކަމާއި ހުޝޫއަތްތެރިކަމާއެކު މާތްﷲ އަށް ހިތް ނިޔަތް ހާލިސްކުރާ ހާލުގައި ކަމަށް މިއަދުގެ ހުކުރު ހުތުބާގައި ވަނީ ބުނެފަ އެވެ. އަދި ފަރުވާކުޑަކޮށް އާދައިގެ މަތިން ކޮށްލާ ކަމެއްގެ ގޮތުގައި ނަމާދުކޮށްގެން، މާތްﷲ އެ ނަމާދު ގަބޫލުނުކުރައްވާނެ ކަމަށް ވެސް ހުތުބާގައި ވަނީ ބުނެފަ އެވެ.

ފަރުވާކުޑަކޮށް، އާފިލުކަންމަތީ ތިބެގެން ނަމާދުކުރާ މީހުންނަށް ދަރުމައެއް ނެތްކަން ފާހަގަކުރަމުން ހުތުބާގައި ބުނެފައިވަނީ، އެފަދައިން ނަމާދުކުރާ މީހުންނަށް ހުރީ ގެއްލުމާއި ހަލާކު ކަމަށެވެ. މި ސަބަބުތަކަށްޓަކައި ނަމާދުގައި ހުޝޫއަތްތެރިވުމަކީ މުހިއްމުކަމެއް ކަމަށް ހުތުބާގައި ބުނެފައިވެ އެވެ.

ނަމާދު ކުރަންވީ ގޮތަށް، ބިރުވެތިކަމާއި، ހުޝޫއަތްތެރިކަމާއެކު ނަމާދުކުރާ މީހުންނަށް ދުނިޔެއާއި އާހިރަތުގައި ވެސް ހެޔޮ ދަރުމަ ލިބޭނެކަމަށް ހުތުބާގައި ވަނީ ބުނެފަ އެވެ. މީގެ އިތުރުން އެފަދަ މީހުންގެ ދުނިޔަވީ އެހެނިހެން އަމަލުތައް ވެސް ހެޔޮވާނެ ކަމަށް ހުކުރު ހުތުބާގައި ވަނީ ބުނެފަ އެވެ.

އެހެންނަމަވެސް، ނަމާދުކޮށްގެން އުޅޭ މުސްލިމުންގެ ތެރޭގައިވެސް ހުތުރު ފާފަތައް ކުރާ މީހުން މަދު ނޫންކަން ފާހަގަކުރަމުން ހުތުބާގައި އިތުރަށް ބުނެފައިވަނީ އެފަދަ މީހުންނަށް ނަމާދު ކުރެވެނީ ބިރުވެތިކަމާއި، ހުޝޫއަތްތެރިކަމާ އެކުގައިތޯ، އެބައިމީހުންގެ އަމިއްލަ ނަފުސުތަކާއި ސުވާލުކުރަންޖެހޭ ކަމަށެވެ.

ނަމާދަށް ހުންނައިރު ބޭކާރު ހަރަކާތްތަކުން ދުރުހެލިވުމަށްވެސް މިއަދުގެ ހުކުރު ހުތުބާގައި ވަނީ ނަސޭހަތްތެރިވެފަ އެވެ.