ދިވެހި ތަރިކައާއި ދިވެހިވަންތަކަމުގެ ދާއިރާ އިލްމީ ގޮތުން ކުރިއެރުވުމަށް ޓަކައި 40 ސްކޮލަޝިޕް ފުރުސަތު ހުޅުވާލައިފި އެވެ.

ދިވެހި ތަރިކަ ދިރާސާކުރާ ގައުމީ މަރުކަޒުން "ސިގްނޭޗަ ސްކޮލަޝިޕް" ގެ ނަމުގައި ތައާރަފުކުރި މި ސްކޮލަޝިޕުތަކަކީ، ރާއްޖޭގެ އިސްލާމީ ޔުނިވަސިޓީގެ މާސްޓަސް ޑިގްރީއެއް ހާސިލުކުރެވޭ ގޮތަށް، ދިވެހި ތަރިކަ ދިރާސާކުރާ ގައުމީ މަރުކަޒުން ސްޕޮންސާކުރާ ފުރުސަތުތަކެކެވެ. މި ސްކޮލަރޝިޕް ފުރުސަތުތަކުގައި ކިޔަވާ ދަރިވަރުންގެ ކޯސްފީ ދެއްކުމަށް ހަމަޖެހިފައި ވަނީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަލަށް އުފެއްދެވި، ގައުމީ ތަރިކަ ދިރާސާކުރާ ގައުމީ މަރުކަޒުންނެވެ. 

މި ސްކޮލަޝިޕްގައި ފުރިހަމަކުރަންޖެހޭނީ އިސްލާމީ ޔުނިވަސިޓީން ކުރިއަށްގެންދާ މާސްޓަ އިން ރިސާޗް އެންޑް ޕަބްލިކޭޝަންސް ޕްރޮގުރާމެވެ. ސްކޮލަޝިޕްގެ ދަށުން ހިންގާ ދިރާސީ މަސައްކަތްތަކުގެ މުއްދަތަކީ ދެ އަހަރު ދުވަހެވެ. މި މަސައްކަތުގެ ތެރެއިން ކޮންމެ މަހަކު ދެ ދުވަހު ދިވެހި ތަރިކަ ދިރާސާކުރާ ގައުމީ މަރުކަޒުގައި އިލްމީ ހޯދުންތަކާ ގުޅޭ މަސައްކަތްކުރަން ޖެހޭނެ އެވެ.

މި ފުރުސަތު ދިނުމަށް ނިންމާފައިވަނީ 40 ދަރިވަރުންނަށެވެ. ސްކޮލަޝިޕްގައި ބައިވެރިވުމަށް އެދި ހުށަހެޅުމުގެ ފުރުސަތު މި މަހުގެ 25 ވަނަ ދުވަހުގެ މެންދުރު ފަހު 14:00އާ ހަމައަށް މިހާރު ވަނީ ހުޅުވާލާފަ އެވެ. ސްކޮލަޝިޕަށް އެދި ގޫގުލް ފޯމް ލިންކެއް މެދުވެރިކޮށް ހުށައެޅޭނެ އެވެ. މި ލިންކު ދިވެހި ސަރުކާރުގެ ގެޒެޓުގައި ޝާއިއުކޮށްފައިވާ ސްކޮލަޝިޕާ ގުޅޭ އިއުލާނުގައި ހިމަނާފައިވެ އެވެ. މި ސްކޮލަޝިޕްގައި ބައިވެރިވެވޭނީ ރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 7، 8 ނުވަތަ 9ގެ ސަނަދެއް ހާސިލުކޮށްފައިވާ މީހުންނަށް އެކަންޏެވެ.

ތަރިކަ ދިރާސާކުރާ ގައުމީ މަރުކަޒުން ބުނިގޮތުގައި މިފަދަ ފުރުސަތެއް ހުޅުވާލުމުގެ މަގުސަދަކީ ދިވެހި ތަރިކައިގެ އިލްމު އުފައްދައި، ގާބިލު ތަރިކަވެރީންތަކެއް އުފެއްދުންކަމަށެވެ.

މި ސްކޮލާޝިޕްގައި ބައިވެރިވާ މީހުންނަށް ތަރިކައިގެ ދާއިރާގެ ކޮންމެވެސް އެއް ފަންނެއް އިލްމީ ގޮތެއްގައި ފުންކޮށް ދަސްކުރުމުގެ ފުރުސަތު ލިބޭނެ އެވެ. އަދި މި ސްކޮލަޝިޕްގައި ބައިވެރިވާ ފަރާތްތަކަށް ތަރިކައިގެ ދާއިރާގެ އިލްމީ އަދި ދިރާސީ ފޮތްތައް ޝާއިއުކުރުމުގެ ފުރުސަތުވެސް ލިބޭނެ އެވެ.

ދިވެހި ތަރިކަ ދިރާސާކުރާ ގައުމީ މަރުކަޒުގެ ނަމުގައި ސަރުކާރުގެ އިދާރާއެއް ގާއިމުކުރެއްވީ، "ދިވެހި ގައުމިއްޔަތު އިއާދަކުރުމުގެ ގައުމީ ނިޒާމު" ގެ ތެރެއިން ދިވެހިބަހާއި ތާރީހާއި ސަގާފަތާއި ތަރިކައާއި އާދަކާދަތަކާއި ގައުމިއްޔަތުގެ އިލްމެއް އުފަންކޮށް ދިރުވައި އާލާކުރުމަށާއި، ގައުމީ ރޫހު އާލާކޮށް އާންމުކޮށް ދިވެހިންގެ މެދުގައި ގައުމިއްޔަތުގެ އިލްމާއި ވިސްނުން އުފެއްދުމުގެ މަސައްކަތްކުރުމުގެ ބޭނުމުގައި 2024 ވަނަ އަހަރުގެ ޖެނުއަރީ މަހުގަ އެވެ. 

ދިވެހި ތަރިކަ ދިރާސާކުރާ ގައުމީ މަރުކަޒުގެ މަސައްކަތްތަކުގެ ތެރޭގައި ދިވެހިންގެ މެދުގައި ދިވެހިވަންތަކަމާއި ދިވެހިންގެ ހައްގުގައި ހިދުމަތްކުރުމުގެ ވިސްނުމާއި ރޫހު ދިރުވައި އާލާކުރުމަށް މަސައްކަތްކުރުމާއި ރާއްޖެއާއި ދިވެހި ގައުމިއްޔަތާ ގުޅޭގޮތުން އެކިއެކި ބަސްބަހުން ލިޔެ އުފައްދައިފައިވާ ލިޔުންތައް ދިވެހިބަހަށް ތަރުޖަމާކުރުމާއި ރާއްޖެއާއި ދިވެހިންނާ ގުޅޭގޮތުން ހުރި އެވޭލާ ބަސްމަގުގެ ތަކެތި މިހާރުގެ ބަސްމަގަށް ގެނައުން ފަދަ ކަންކަން ހިމެނެ އެވެ.