މަސްތުވާތަކެތީގެ އޮޕަރޭޝަނެއްގައި ފުލުހުންގެ އަމުރަށް ނުކިޔަމަންތެރިވުމުން އެމްޑީޕީގެ އެކްޓިވިސްޓު ޙުސައިން ޙަސަން ހައްޔަރުކޮށްފި އެވެ.

މި މައްސަލަ އާއި ގުޅިގެން ފުލުހުން ބުނެފައި ވަނީ، އޭނާ ހައްޔަރުކޮށްފައި ވަނީ މަސްތުވާތެކެތީގެ އޮޕަރޭޝަނެއް ކުރިއަށް ދިޔަ ސީނެއްގެ ތެރެއަށް ވަދެ، ފޮޓޯ ނަގަން ފެށުމުން ފުލުހުންގެ އޮޕަރޭޝަނަށް ދަތިނުވާނެ ގޮތަށް ޢަމަލުތައް ބެހެއްޓުމަށް ނަސޭޙަތްތެރިވުމުން ވެސް، ފުލުހުންގެ އެންގުމާއި ޚިލާފަށް އޮޕަރޭޝަންގެ ތެރެއަށް ވަދެ، ހެކީގެ ފޮޓޯ ނަގަން މަސައްކަތް ކުރުމާއި ގުޅިގެން ކަމަށެވެ.

ހުސައިން ހައްޔަރުކުރުމާއި ގުޅިގެން އެމްޑީޕީން އަންނަނީ އޭނާ ދޫކޮށްލުމަށް ސޯޝަލް މީޑިއާގެ އެކި މަންސަތަކުގައި ގޮވައިލަމުންނެވެ. އެގޮތުން އެމްޑީޕީން އެކްސްގައި ހިއްސާކުރި ޕޯސްޓެއްގައި ބުނެފައިވަނީ، އޭނާ ހައްޔަރުކުރީ ބާރުގެ ބޭނުންކޮށްގެން ކަމަށާއި، ސިޔާސީ ދާއިރާގައި ޙަރަކާތްތެރިވާ ފަރާތްތަކަށް ބިރު ދެއްކުން ހުއްޓާލަން ޖެހޭކަމަށެވެ.

ޙުސައިންއަކީ އެމްޑީޕީގެ ޤައުމީ މަޖިލީހުގެ މެންބަރެކެވެ.

އެޑިޓަރުގެ ނޯޓް:

ނޫސްވެރިން ހިނގަމުންދާ ތަޙްޤީޤުތަކުގައި ވެސް ޤާނޫނު ތަންފީޛުކުރާ ފަރާތްތަކުގެ އުޞޫލުތަކަށް ހުރަސް އެޅުމަކީ ނޫސްވެރިން ޢަމަލުކުރަން ޖެހޭ ކޯޑް އޮފް ކޮންޑަކްޓްތަކާއި ޚިލާފު ކަމެކެވެ.

އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން މާނަކުރާ ގޮތުގައި ވެސް އެކްޓިވް ކްރައިމް ސީނެއްގައި ފޮޓޯ ނުނެގޭނެ ކަމަށް ފުލުހުން ބުނާ ނަމަ ނޫސްވެެރިޔާ އެއަށް އިޙްތިރާމް ކުރުމަކީ އެތިކަލް ރިޕޯޓިންގެ ބައެކެވެ.