ސައުތު އޭޝިއަން ސުޕަރ ކަޕުގެ ފުރަތަމަ މެޗުގައި ސްރީލަންކާ ކޮޅަށް ތިން ލަނޑު ޖަހައި އަދި ދެވަނަ މެޗު 1-1 ނަތީޖާއިން އެއްވަރުކޮށް ދިވެހިރާއްޖެއިން އެ މުބާރާތުގެ ތަށި އުފުލާލައިފި އެވެ.
މިއަދު ހަވީރު ކޮލޮމްބޯގައި ކުޅުނު މި މެޗުގެ ދެ ގޯލުވެސް ފެނިފައިވަނީ މެޗުގެ 60 ވަނަ މިނެޓަށް ފަހުގައެވެ. ފުރަތަމަ ގޯލު މެޗުގެ 67 ވަނަ މިނެޓުގައި ނާއިޒް ހަސަން (ދާދު) ކާމިޔާބުކުރިއިރު މެޗު އެއްވަރުކޮށްދިން ގޯލު ލަންކާ އަށް ޖަހައިދިނީ 2+90 ވަނަ މިނެޓުގައި ކެލާޓެވެ.
މެޗު ފަށާފައުވަނީ ގައުމީ ޓިމުގެ ކެޕްޓަން ސަމޫހް އަލީ (ސުމައްޓެ) އާ ނުލައެވެ. ކުޑަ އަނިޔާއެއް ސަބަބުން އޭނާ މެޗު ފަށާފައި ނުވިނަމަވެސް އަހްމަދު ރިޒްވާނަށް އަނިޔާވުމުން އޭނާގެ ބަދަލުގައި ސުމައްޓެ ވަނީ ކުޅެން އަރާފައެވެ.
މި މެޗުގައި ދެ ޓީމަށް ވެސް ގޯލު ޖަހާނެ ރަނގަޅު ފުރުސަތުތަކެއް ލިބިފައިވެއެވެ. އެގޮތުން މެޗު ފަށާއިގެން ހަތަރު ވަނަ މިނެޓުގައި އޭރިއާ ބޭރުން އިބްރާހިމް މަހުދީ (ފޭދޫ އިއްބެ) ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ. އޭގެ ފަސް މިނެޓު ފަހުން ލަންކާ ޓީމުގެ ކުޅުންތެރިއެއް ތިރިން ފޮނުވާލި ހަމަލާ އަމާޒުވީ ގޯލުގެ ތިރީ ދަނޑިއަށެވެ. އަދި މީގެ އިތުރުން ގިނަ ފުރުސަތުތަކެއް ދެ ޓީމަށް ވެސް ލިބިފައިވެއެވެ.
4-1 ގެ އެގްރިގޭޓަކުން މޮޅުވެ ރާއްޖެ ތަށި ނަގާފައިވާއިރު މިއީ މި މުބާރާތް ކުޅުނު ފުރަތަމަ ފަހަރެވެ. ބަންގްލަދޭޝާއި ބޫޓާން ކުރިން މި މި މުބާރާތުގައި ބައިވެރިވާން އޮތް ނަމަވެސް އެ ދެ ގައުމުން ވަނީ ފަހުން ބައިވެރިނުވާން ނިންމާފައެވެ. އެހެން ކަމުން މުބާރާތުގައި ކުޅެފައިވަނީ ލަންކާ-ދިވެހިރާއްޖެ ބައްދަލުކުރި ދެ މެޗު އެކަންޏެވެ.
މި މުބާރާތާ ކުރިމަތިލިއިރު އޭގެ ކުރން ކުޅުނު ބައިނަލްއަގްވާމީ ފަސް މެޗުން ވެސް ރާއްޖެ ވަނީ ބަލިވެފައެވެ. ޓީމަށް ލިބުނު ދަށް ނަތީޖާތަކަށް ފަހު އޭރު ކޯޗު ކަމުގައި ހުންނެވި އަލީ ސުޒެއިން ވަނީ މިދިޔަ ޖޫން މަހު އިސްތިއުފާ ދެއްވާފައެވެ. އެއަށް ފަހު ކޯޗު ކަމާއި ހަވާލުވެ މުޙައްމަދު ޝިޔާޒު (މޯހަން) މިވަނީ އޭނާ ކުޅުނު ފުރަތަމަ މެޗު ރާއްޖެއަށް ކާމިޔާބުކޮށް އަދި ދެވަނަ މެޗު އެއްވަރުކޮށް ރާއްޖެއަށް ރަން ތައްޓެއް ހޯދައިދީފައެވެ.
މުބާރާތުގައި ރާއްޖެއާ ވާދަކުރި ލަންކާގެ ޓީމަށް ބަލާއިރު ލަންކާ އަކީ ޤައުމުން ބޭރުގައި ކުޅޭ ކުޅުންތެރިންނަށާއި އެހެން ގައުމުތަކަށް ނިސްބަތްވާ ލަންކާ ދަރިކޮޅު ކުޅުންތެރިންނަށް ރަށްވެހިކަން ދީގެން ގައުމީ ޓީމަށް ކުޅޭ ކުޅުންތެރިން ތިބި ޓީމެކެވެ. އެހެންކަމުން ރާއްޖެ %100 ދިވެހިންނާއެކު މި ހޯދި ތައްޓަކީ ފަހުރުވެރި ކާމިޔާބީއެކެވެ.
