ރަޝިޔާގެ އެމްއާރްއެންއޭ ކެންސަރު ވެކްސިން، އެންޓެރޯމިކްސް، ކޮލޯރެކްޓަލް ކެންސަރަށް އަމާޒުކޮށްގެން ކުރެވުނު ފުރަތަމަ ކްލިނިކަލް ޓްރަޔަލްތަކުގައި 100 ޕަސެންޓް ރައްކާތެރިކަމާއި ކާމިޔާބު ހޯދައިފިއެވެ.
ރަޝިޔާއިން އިއުލާނުކޮށްފައިވާ ގޮތުގައި އެގައުމުގެ އާ ކެންސަރު ވެކްސިން، އެންޓެރޯމިކްސް އަކީ ކެންސަރާ ދެކޮޅަށް ކުރަމުންދާ ހަނގުރާމަޔަށް ހޯދުނު އުއްމީދީ ކުރިއެރުމެކެވެ. އެގޮތުން އެ ވެކްސިން ބޭނުންކޮށްގެން އިންސާނުންގެ މައްޗަށް ކުރެވުނު ފުރަތަމަ ޓްރަޔަލްތަކުގައި ފުރިހަމަ ކާމިޔާބީއެއް ހޯދާފައިވާ ކަމަށާއި މި ޓްރަޔަލްތަކުގައި ބަލިމީހުންގެ ޓިއުމަރު ކުޑަވެ، އެއްވެސް ނުރައްކާތެރި ސައިޑް އިފެކްޓެއް ފެނިފައިނުވާކަން ވަނީ ހާމަކޮށްފައެވެ.
މި ޓްރަޔަލްތަކުގައި 48 ވޮލަންޓިއަރުން ބައިވެރިވެފައިވާއިރު، މި ޓެސްޓުތައް ކުރިއަށް ގެންގޮސްފައިވަނީ ރަޝިޔާގެ ނެޝަނަލް މެޑިކަލް ރިސާޗް ރޭޑިއޮލޮޖިކަލް ސެންޓަރާއި އެންގެލްހާޓް އިންސްޓިޓިއުޓް އޮފް މޮލެކިއުލާ ބަޔޮލޮޖީގެ އެއްބާރުލުމާއެކު އެވެ.
ރަޝިިޔާއިން ހާމަކޮށްފައިވާ ގޮތުގައި ކޮވިޑް-19 ވެކްސިންތަކުގައި ބޭނުންކުރި އެމްއާރްއެންއޭ ޓެކްނޮލޮޖީ ބޭނުންކޮށްގެން ތައްޔާރުކޮށްފައިވާ މި ވެކްސިންއަކީ އިމިއުން ސިސްޓަމަށް ކެންސަރު ސެލްތައް ދެނެގަނެ ނައްތާލަން ދަސްކޮށްދޭ، ކީމޯތެރަޕީ ފަދަ އާންމު ފަރުވާތަކަށްވުރެ ރައްކާތެރި އޮޕްޝަނެކެވެ. އެންޓެރޯމިކްސްގެ އެންމެ ފާހަގަކޮށްލެވޭ އެއް ސިފައަކީ ކޮންމެ ބަލިމީހަކަށްވެސް އެމީހެއްގެ ޓިއުމަރުގެ ޕްރޮފައިލްއަށް ފެތޭގޮތަށް ހާއްސަކޮށް ތައްޔާރުކުރެވޭ އިމިއުނޯތެރަޕީއަކަށް ވުމެވެ. 2025 ސެއިންޓް ޕީޓަސްބާގް އިންޓަނޭޝަނަލް އިކޮނޮމިކް ފޯރަމްގައި ރަޝިޔާއިން އިއުލާނު ކުރި މި ވެކްސިނަށް އެ ގައުމުގެ މިނިސްޓްރީ އޮފް ހެލްތުގެ ހުއްދަ ލިބުމާ ކައިރިވެފައިވާކަމަށް ރިޕޯޓުތައް ބުނެ އެވެ.
މި އާ ވެކްސިންގެ ކާމިޔާބީއާއެކު، ކެންސަރު ފަރުވާގެ ދާއިރާގައި އާ ޒަމާނެއްގެ ފެށުމެއް ފެނިގެންދާނެ ކަމަށް ދުނިޔޭގެ އޮންކޮލޮޖީ ދާއިރާގެ ތަޖުރިބާކާރުން އުއްމީދުކުރެއެވެ. މިއީ ކޮންމެ މީހަކަށް ހާއްސަކޮށް، ނަތީޖާ ރަނގަޅު، އަދި ސައިޑް އިފެކްޓް މަދު ކެންސަރު ފަރުވާއެއްގެ ގޮތުގައި ފާހަގަކުރެވެއެވެ.
