ރަޝިޔާ އިން އުފެއްދި ދުނިޔޭގެ ފުރަތަމަ އެމްއާރްއެންއޭ ކެންސަރު ވެކްސިން ކާމިޔާބު ކަމަށް އެ ވެކްސިން އުފެއްދި ރަޝިޔާގެ ނޭޝަނަލް މެޑިކަލް ރިސާޗް ރޭޑިއޮލޮޖީ ސެންޓަރާއި އެންގްލްހާޑް އިންސްޓިޓިއުޓް އޮފް މޮލިކިއުލަރ ބަޔޮލޮޖީ އިން ބުނެފިއެވެ.
ރަޝިޔާގެ ކުންފުނިން ބުނީ ކެންސަރު ބަލި ޖެހިފައިވާ ފަންސާހަކަށް މީހުންނަށް މި ވެކްސިން ދީފައިވާ ކަމަށާއި، އޭގެތެރެއިން 80 ޕަސެންޓް މީހުންގެ ކެންސަރު ފެތުރުން ހުއްޓިފައިވާ ކަމަށެވެ.
Advertisement
ކެންސަރު ވެކްސިން އެ ޤައުމުގެ ރައްޔިތުންނަށް ހިލޭ ބެހުމަށް ނިންމާފައި ވާއިރު، ދެން އޮތީ ރަޝިޔާގެ ކަމާބެހޭ ފަރާތްތަކުން މި ކެންސަރު ވެކްސިން އެޕްރޫވް ކުރުމުގެ މަރުޙަލާއެވެ.
ރަޝިޔާގެ ކުންފުނިން ބުނީ ކެންސަރުގެ ފުރަތަމަ ސްޓޭޖުގައި އެ ވެކްސިން ޖެހުމުން އެއީ ކޮންމެ ވައްތަރެއްގެ ކެންސަރު ކަމުގައި ވިޔަސް އެ ބަލި ފަސޭހަ ވާނެ ކަމަށެވެ.
ރަޝިޔާއިން ބުނާ ގޮތުގައި މި ވެކްސިން މަސައްކަތް ކުރަނީ ކެންސަރު ސެލްތައް ދެނެގަނެ އެއަށް ޙަމަލާދިނުމަށެވެ. މި ވެކްސިނުން ބަލިމީހާގެ ޓިއުމަރުގައި ހުންނަ މައުލޫމާތު ކޮޕީކޮށް، އެ ކެންސަރު ސެލްތައް އެކީއެކަށް ނައްތާލާ ކަމަށާއި، މިއީ ހުރިހާ ވައްތަރެއްގެ ކެންސަރަކަށް ފަރުވާ ލިބޭ ވެކްސިނެއް ކަމަށް ރަޝިޔާގެ ކުންފުނިން ބުނެއެވެ.
