ގެދޮރުވެރިޔާ ސްކީމްގެ ދަށުން އިމާރާތްކޮށްފައިވާ ފުލެޓްތަކަށް މި ހަފްތާގައި މީހުން ވެއްދުމުގެ މަސައްކަތް ފެށިގެންދާނެކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފި އެވެ.
އެފްޑީސީން ބުނެފައިވާ ގޮތުގައި، ގެދޮރުވެރިޔާ ސްކީމުގެ ދަށުން އިމާރާތްކޮށްފައިވާ 4,000 ފުލެޓުގެ ތެރެއިން، މިހާތަނަށް ފްލެޓަށް ޝަރުތު ހަމަވާ 3,000 އަށްވުރެ ގިނަ ފަރާތަކާއެކު ފްލެޓް އެއްބަސްވުމުގައި ވަނީ ސޮއިކުރެވިފައި ކަމަށެވެ. މީގެ އިތުރުން، މިހާރު މަސައްކަތް ނިމިފައިވާ ފްލެޓްތައް ލިބިފައިވާ ފަރާތްތަކަށް، މި ހަފްތާގެ ތެރޭގައި ފުލެޓްގެ ތަޅުދަނޑި ހަވާލުކުރުމުގެ މަސައްކަތް ކުރިއަށްދާނެ ކަމަށް އެ ކޯޕަރޭޝަނުން ވަނީ ބުނެފަ އެވެ.
ފުލެޓްތައް ހަވާލުކުރާނީ ފިނިޝިންގެ ހުރިހާ މަސައްކަތެއް ނިންމާފައި ކަމަށް އެފްޑީސީން ވަނީ ބުނެފަ އެެވެ. އެ ކޯޕަރޭޝަނުން ބުނެފައިވާ ގޮތުގައި ފްލެޓްތައް ހަވާލުކުރާނީ ފަންކާއާއި ކުޑަދޮރާއި ދޮރު ހަރުކޮށް، ޓައިލްސް ޖަހައި، ކުލަ ލައި، ފާހާނާ ތައްޓާއި މޫނު ދޮންނަ ތަށި ވެސް ހަރުކޮށްފައި ކަމަށެވެ.
ފުލެޓްގެ އެއްބަސްވުންތަކުގައި ސޮއިކުރުމުގެ މަސައްކަތް އެފްޑީސީން ފަށާފައިވަނީ މި އަހަރުގެ ޖުލައި މަހުގެ ތެރޭގަ އެވެ. އެއްބަސްވުންތަކުގައި ސޮއިކުރުމުގެ މަސައްކަތް، ސަރުކާރު ބަންދު ނޫން ކޮންމެ ދުވަހެއްގެ ހެނދުނު 09:00 އިން ފެށިގެން ހަވީރު 04:00 އާއި ހަމައަށް ކުރިއަށް ދާނެކަމަށް އެފްޑީސީން ވަނީ ބުނެފަ އެވެ.
އެއްބަސްވުންތަކުގައި ސޮއިކުރުމުގެ މަސައްކަތް ކުރިއަށް ދާނީ ހުޅުމާލެ ސިންތެޓިކް ޓްރެކުގައި ކަނޑައަޅާފައިވާ ހާއްސަ ސަރަހައްދުތަކުގައި ކަމަށް ވެސް އެފްޑީސީން ވަނީ އިތުރަށް ބުނެފަ އެވެ.
