ޔޫކްރޭން ދިފާޢު ކުރުމަށް ކަމަށް ބުނެ އެމެރިކާ އާއި ހުޅަނގުގެ ޤައުމުތަކުން ސިފައިން ފޮނުވައިފި ނަމަ އެ ސިފައިންނަށް އަމާޒުކޮށް ޙަމަލާ ދޭނެ ކަމަށް ރަޝިއާގެ ރައީސް ވްލަޑީމީރް ޕޫޓިން ވިދާޅުވެއްޖެއެވެ.
ޕޫޓިން ވިދާޅުވީ ރަޝިއާ ކައިރިޔަށް ނުބައި ނިޔަތެއްގައި އެއްވެސް ކަހަލަ އަސްކަރީ ބާރަކުން ޖަމާވާ ކަމުގައި ވަނީ ނަމަ އެ ބަޔަކު މަރައިލުމަކީ ރަޝިއާގެ ސަލާމަތަށް ކުރަން ޖެހޭ ކަމެއްއް ކަމަށާއި، މޮސްކޯ ޙިމާޔަތް ކުރުމަށް ކުރައްވަން ޖެހުނު ކޮންމެ ކަމެއް ކުރައްވާނެ ކަމަށެވެ.
މޮސްކޯ އަށް ގެއްލުން ދިނުމަށް ބޮޑު ލަޝްކަރެއް މިވަގުތު ތައްޔާރުކުރަމުން ދަނީ އެމެރިކާގެ އެކުވެރި ޤައުމުތަކެވެ. އޭގެތެރޭގައި 26 ޤައުމެއް ހިމެނެއެވެ. މި ލަޝްކަރުގައި ޔުކްރޭނުގެ ރައްޔިތުން ސަލާމަތް ކުރުމުގެ ނަމުގައި ސީދާ އެމެރިކާ ސިފައިން ހިމެނޭހެން 35000 އެއްހާ ސިފައިން ތިބޭނެ ކަމަށް ވެއެވެ. މި ޢަދަދު އަދި ސީދާ ސާފެއް ނުވެއެވެ.
ޔޫރަޕްގެ ލަޝްކަރާއި ކުރިމަތިލާން ޖެހިއްޖެ ހިނދެއްގައި އެކަމަށް ރަޝިއާ އޮތީ މިހާރު ވެސް ތައްޔާރަށެވެ. ބެލަރޫސް އާއި ރަޝިއާ އިން ދަނީ ޑްރިލްތައް ބާއްވައި އެ މީހުންގެ ސަލާމަތީ ފިޔަވަޅުތައް ވަރުގަދަ ކުރަމުންނެވެ.
އިއްޔެ ވްލަޑިވޮސްޓޮކްގައި ބޭއްވި އިރުމަތީ އިޤްތިޞާދީ ފޯރަމްގައި ވާހަކަފުޅު ދައްކަވަމުން ޕޫޓިން ފާހަގަކުރެއްވި ގޮތުގައި ޔުކްރޭނަށް އެހެން ބަޔަކު ސިފައިން ފޮނުވުމަކީ ރަޝިޔާގެ މަސްލަޙަތަށް ސީދާ ނުރައްކާ ކުރާނެ ކަމެއް ކަމުގައި ރަޝިއާ އިން ދެކޭނެއެވެ. އަދި އެ ބަޔަކަށް ޙަމަލާދީ “މަރައިލުމަކީ” މޮސްކޯގެ މައްޗަށް ވާޖިބު ވެގެންވާ ކަމެއް ކަމަށް ދެކޭ ކަމަށް ޕޫޓިން ވިދާޅުވިއެވެ. ނަމަވެސް ސީދާ އެމެރިކާގެ ނަން ޕޫޓިން ފާހަގައެއް ނުކުރައްވައެވެ. މުޙައްލިލުން ބުނާ ގޮތުގައި ޕޫޓިން އެ އިންޒާރު ދެއްވީ އެމެރިކާގެ ރައީސް ޑޮނަލްށޑް ޓްރަމްޕަށެވެ.
ޔޫކްރޭނަށް ދިޔުމަށް 26 ޤައުމަކުން ތައްޔާރަށް ތިބި ކަމަށް ހާމަކުރެއްވީ ފްރާންސްގެ ރައީސް އިމަނުއެލް މެކްރޮން އެވެ. މި ޤައުމުތަކުގެ ތެރޭގައި ފްރާންސް، އިނގިރޭސިވިލާތް، ޖަރުމަން، އިޓަލީ، ސްޕެއިން، ޕޮލެންޑް، ބަލްގޭރިއާ، ބާލްޓިކް އަދި ނޯޑިކް ޤައުމުތަކާއި، ނެދަލެންޑްސް، އަދި އޮސްޓްރޭލިއާ ހިމެނެއެވެ. އެމެރިކާ އޮތީ ވައިގެ މަގުން ޙަރަކާތްތެރިވާނެ ޓީމެއް ފޮނުވުމަށް ތައްޔާރަށެވެ.
ޕޫޓިން ތަކުރާރުކޮށް ވިދާޅުވީ ރަޝިޔާގެ އެންމެ ބޮޑު ކަންބޮޑުވުމަކީ ނޭޓޯ ފުޅާކުރުމާއި ޚާއްސަކޮށް ރަޝިއާގެ ބުޑުގައިވާ ޔޫކްރޭން ނޭޓޯ އަށް ވެއްދުމަށް ކުރަމުންދާ މަސައްކަތެވެ.
ޕޫޓިން ވިދާޅުވީ ޞުލަޙައިގެ އެއްބަސްވުމަކަށް އޭނާ ތާޢީދު ކުރައްވާ ކަމަށާއި، އެ އެއްބަސްވުމުގެ ފަހުން ޔޫކްރޭނުގައި ބޭރުގެ އެއްވެސް ޤައުމެއްގެ ސިފައިން ތިބުމަކީ އެއްވެސް ޤައުމަކަށް ލިބިގެންވާ ޙައްޤެއް ނޫން ކަމަށެވެ. ސަބަބަކީ އެ ކަމުގެ ސަބަބުން ފިތުނަތައް އިތުރަށް ބޮޑުވެދާނެތީއެވެ.
