ދިވެހި ބަހުގެ އެކަޑަމީއިން ވާހަކަ ދެއްކުމުގެ 28 ވަނަ ގައުމީ މުބާރާތް ފަށައިފި އެވެ.
އެ މުބާރާތް ކުރިއަށް ގެންދިއުމަށް ހަމަޖެހިފައި ވަނީ އޮގަސްޓް މަހުގެ 27 ވަނަ ދުވަހުން ފެށިގެން ސެޕްޓެމްބަރު މަހުގެ 13 ވަނަ ދުވަހުގެ ނިޔަލަށެވެ.
ސަލްމާން މިސްކިތުގެ އޮޑިޓޯރިއަމްގައި ކުރިއަށް ދާ، އެމުބާރާތުގައި ދަށު ސާނަވީ ގިންތީގައި 26 އިސްކޫލަކުން 105 ދަރިވަރުންނާއި، ސާނަވީ ގިންތީގައި 21އިސްކޫލަކުން 102 ދަރިވަރުންނާއި، މަތީ ސާނަވީ ގިންތީގައި 5 އިސްކޫލަކުން 25 ދަރިވަރުންނާއި، ތަފާތު ގޮތަކުން ކުޅަދާނަ 3 ދަރިވަރަކާއި އަމިއްލަ ފަރާތްތަކުގެ ބައިގައި 18 އަހަރުން ދަށުގެ 3 ބައިވެރިއަކާއި 18 އަހަރުން މަތީގެ އުމުރުފުރާއިންއަމިއްލަ ގޮތުން 1 ފަރާތެއް ބައިވެރިވެފައިވެ އެވެ.
ޖުމްލަ 239 ފަރާތަކުން ބައިވެރިވެފައިވާ އެ މުބާރާތުގައި މިހާރު ކުރިއަށް ދަނީ ދަށު ސާނަވީ އުމުރުފުރައިގެ ދަރިވަރުންގެ ވާހަކަ ދެއްކުމެވެ. އެ މުބާރާތުގައި މިހާތަނަށް 96 ދަރިވަރަކު ވާހަކަދައްކާފައިވާ އިރު، ދަށު ސާނަވީ ގިންތީގެ ދަރިވަރުންގެ ވާހަކަދެއްކުން މިއަދު ނިމޭނެ ކަމަށް ދިވެހި ބަހުގެ އެކަޑަމީ އިން ވަނީ ބުނެފަ އެވެ. އެ މުބާރާތުގެ އިސްކޫލުތަކުގެ ބައި ކުރިއަށް ގެންދަނީ ދެ ބުރަކަށް ބަހައިލައިގެންނެވެ. އެއީ ފައްސިޔަ ބުރާއި އަރުތަ ބުރެވެ.
ފައްސިޔަ ބުރުގައި ދަށު ސާނަވީ ގިންތީގެ ދަރިވަރުން ވާހަކަދެއްކުމަށް ގުރުއަތުން ނެގޭ މައުލޫއަށް ތައްޔާރުވުމަށް 3 މިނެޓުގެ ވަގުތު ދީ، ދަރިވަރުން ވާހަކަދެއްކުމަށް 5 މިނެޓުދެވެއެވެ. އަދި ސާނަވީ ގިންތިއާއި މަތީ ސާނަވީ ގިންތީގެ ދަރިވަރުންނަށް ވެސް ގުރުއަތުން ނެގޭ މައުލޫއަށް ތައްޔާރުވުމަށް 3 މިނެޓުގެ ވަގުތު ދީ، ވާހަކަދެއްކުމަށް 7 މިނެޓުގެ ވަގުތު ދެވޭނެ އެވެ.
މީގެ އިތުރުން ދަށު ސާނަވީއާއި މަތީ ސާނަވީ ގިންތީން ފައްސިއްޔަ ބުރުގައި ވާދަކުރާ ދަރިވަރުންގެ ތެރެއިން އެންމެ މަތީ މާކުސް ހޯދައިގެން ކޮންމެ ގިންތިއަކުން އެންމެ މޮޅު 10 ދަރިވަރުންގެ ގޮތުގައި ހޮވޭ ދަރިވަރުން ވާދަކުރާނީ އަރުތަ ބުރުގަ އެވެ. އަރުތަ ބުރުގައި ވާހަކަދައްކާ ބައިވެރިން ތަރުތީބުކުރާނީ ވަގުތުން ނަގާ ގުރުއަތަކުންނެވެ.
އަރުތަ ބުރުގައި ހުރިހައި ބައިވެރީންނަށް ވެސް ވާހަކަދައްކާން ހަވާލުކުރާނީ އެއް މައުލޫއެކެވެ. ނުވަތަ އެއް ސުވާލެކެވެ. ފައްސިޔަ ބުރާ ހިލާފަށް، މި ބުރުގައި ދަރިވަރުން ވާހަކަދައްކާނީ، ޕޯޑިއަމަކާ ނުލައި، ޕްރެޒެންޓޭޝަން ހުށަހަޅާ އުސްލޫބަށެވެ. ދަށު ސާނަވީ ދަރިވަރުންގެ އަރުތަބުރު ކުރިއަށް ދާނީ 6 ސެޕްޓެންބަރު ވާ ހޮނިހިރު ދުވަހު އެވެ.
