ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މެލޭޝިޔާގެ މިނިވަން ދުވަހުގެ ތަހުނިޔާ އެގައުމުގެ ރަސްގެފާނު ސުލްތާން އިބްރާހީމާއި އެގައުމުގެ ބޮޑުވަޒީރު އަންވަރު އިބްރާހީމަށް ފޮނުއްވައިފި އެވެ.
މެލޭޝިޔާގެ މިނިވަން ދުވަހާއި ގުޅިގެން ރައީސް ޑރ. މުއިއްޒު، އެމަނިކުފާނުގެ އެކްސް އެކައުންޓުގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ މިއަހަރުގެ އޭޕްރީލް މަހު އެމަނިކުފާނު މެލޭޝިއާއަށް ކުރެއްވި ރަސްމީ ދަތުރުފުޅުގެ ސަބަބުން ދެ ގައުމުގެ މެދުގައި އޮތް އެއްބައިވަންތަކަމާއި ޒަމާންވީ ގުޅުން އިތުރަށް ވަރުގަދަވެފައިވާ ކަމަށެވެ.
ރާއްޖެއާއި މެލޭޝިއާއާ ދެމެދުގައި އޮންނަ ގުޅުން މިހާރަށްވުރެ އިތުރަށް ބަދަހިވެ، އިގުތިސާދީ ގޮތުން އެ ގުޅުން ފުޅާވެ، ދެ ގައުމުގެ ރައްޔިތުންނަށްވެސް އިތުރު ފުރުސަތުތައް ލިބިގެންދާނެކަމުގެ ޔަގީންކަން އެބައޮތްކަމަށް ރައީސް ވަނީ ވިދާޅުވެފަ އެވެ. މީގެ އިތުރުން މެލޭޝިޔާގެ ރަސްގެފާނަށާއި ބޮޑުވަޒީރަށް ދުޅަހެޔޮ ސިއްހަތަކަށް އެދިވަޑައިގަންވާ ކަމަަށާއި މެލޭޝިޔާގެ ރައްޔިތުންނަށް ކުރިއެރުމާއި ފާގަތިކަމަށް ރައީސް ވަނީ އެދިވަޑައިގެންފަ އެވެ.
މެލޭޝިއާއަކީ މުހިންމު ބައިވެރިއެއް ކަމަށާއި ކުރިއަށް އޮތް ތަނުގައިވެސް ދެ ގައުމުގެ ގުޅުން އިތުރަށް ބަދަހިކުރުމަށް ދެ ގައުމުން ގުޅިގެން އިތުރަށް މަސައްކަތް ކުރައްވާނެ ކަމުގެ ޔަގީންކަން ރައީސް ވަނީ ދެއްވައިފަ އެވެ.
