ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާގެ ރައީސް ޝީ ޖިންޕިންއާ މިއަދު ބައްދަލު ކުރައްވައިފި އެވެ.

ރައީސް ޑރ. މުއިއްޒު ޗައިނާގެ ރައީސް ޝީ އާއި ބައްދަލުކުރައްވާފައިމިވަނީ ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި ބައިވެރިވެވަޑައިގަތުމަށް އެމަނިކުފާނު މިހާރު ޗައިނާއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. ރައީސް ޑރ. މުއިއްޒު ޗައިނާއަށް ރަސްމީ ދަތުރުފުޅެއް ކުރެއްވުމުން ޗައިނާގެ ރައީސް ޝީ ވަނީ އެމަނިކުފާނަށް ހޫނު މަރުހަބާއެއް ކިޔާފަ އެވެ.

މި ބައްދަލުވުމާއި ގުޅިގެން ރައީސް އޮފީހުން ބުނެފައިވަނީ ދެ ގައުމުގެ ދެމެދުގައި ޒަމާނުއްސުރެ އޮތް ގާތް ގުޅުން އިތުރަށް ބަދަހިކުރުމުގެ މުހިންމުކަމާ ގުޅޭ ގޮތުން ޗައިނާގެ ރައީސް ޝީ ވާހަކަފުޅު ދައްކަވާފައިވާ ކަމަށެވެ.

ރައީސް ޑރ. މުއިއްޒު ވަނީ ވެރިކަމާ ހަވާލުވެވަޑައިގެންނެވި ފަހުން ދެވަނަ ފަހަރަށް ޗައިނާއަށް ވަޑައިގަތުމަށް ފުރުސަތު ލިބިވަޑައިގަތުމުން އެކަމާ އުފާ ކުރައްވާކަމަށް ވިދާޅުވެފަ އެވެ. ރައީސް މުއިއްޒު ވަނީ ޗައިނާގެ ރައީސް ޝީ އެމަނިކުފާނަށް ކިޔުއްވި ހޫނު މަރުހަބާއަށާއި ދެއްވި ފުރިހަމަ މެހެމާންދާރީއަށް ޝުކުރު އަދާކުރައްވައިފަ އެވެ. މީގެ އިތުރުން ޗައިނާގެ ރައީސް ޝީ ވަނީ ރާއްޖޭގެ ގައުމީ ތަރައްގީގެ ލަނޑުދަނޑިތައް ހާސިލްކުރުމުގައި ރާއްޖެއަށް ފުރިހަމަ އެއްބާރުލުން ދޭނެކަމުގެ ފުރިހަމަ ޔަގީންކަން ދެއްވައިފަ އެވެ.

މި ބައްދަލުވުމުގައި ކޮމްޕްރިހެންސިވް ސްޓްރެޓެޖިކް ކޯޕަރޭޓިވް ޕާޓްނަޝިޕް ގެ ދަށުން ރާއްޖެއާއި ޗައިނާގެ ގުޅުން އިތުރަށް ވަރުގަދަކުރުމަށް ދެ ގައުމުގެ ރައީސުން ވަނީ މަޝްވަރާކުރައްވައިފަ އެވެ.