އިންޖިނޭރުންނާ ނުލައި، މި ދެކޭ ފަސޭހަ ދިރިއުޅުމެއް ނުލިބޭނެ: ފަހުމީ

އެކި ދާއިރާތަކުގެ އިންޖީނިއަރުންގެ ހުނަރާއި ހިތްވަރާ ނުލައި، މިއަދު މި ދެކޭ ފަސޭހަ ދިރިއުޅުމެއް ލިބިގެން ނުދާނެ ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެކްލޯ)ގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެ އެވެ.

ފަހުމީ މި މޭރުމުން ވިދާޅުވެފައިވަނީ އިންޖިނޭރުންގެ ދުވަހުގެ މުނާސަބަތާ ގުޅިގެން އޭނާގެ އެކްސް އެކައުންޓްގައި ހިއްސާކުރެއްވި ޕޯސްޓެއްގަ އެވެ. ފަހުމީ ވިދާޅުވެފައިވާ ގޮތުގައި އިންސާނިއްޔަތަށް ފަސޭހަ ދިރިއުޅުމެއް ގެނެސްދިނުމަށް އަގުނުކުރެވޭ މަސައްކަތްތަކެއް ކުރަމުން ގެންދާ ހީވާގި އިންޖީނިއަރުންނަށް ޝުކުރާއެކު، އިންޖީނިއަރުންގެ ދުވަހުގެ ހެޔޮ އެދުމާއި ތަހުނިޔާ އަރިސްކުރާ ކަމަށެވެ.

ގައުމު ބިނާކޮށް ތަރައްގީގެ މަގުގައި އެއްވެސް ފަސްޖެހުމެއްނެތި، ދިގުދެމިގެންދާ ގޮތަށް ހިދުމަތްތައް ފޯރުކޮށްދިނުމުގައި، ސްޓެލްކޯގެ ހީވާގި އިންޖީނިއަރުން ކުރަމުން ގެންދާ އަގުނުކުރެވޭ މަސައްކަތްތަކަށް ސްޓެލްކޯގެ މުޅި އިންޖީނިއަރުންގެ ޓީމަށް ހިތުގެ ފުންމިނުން ޝުކުރު ފަހުމީ ވަނީ ޝުކުރު އަދާ ކޮށްފަ އެވެ. އެކި ދާއިރާތަކުގެ އިންޖީނިއަރުންގެ ހުނަރާއި ހިތްވަރާ ނުލައި، އަހަރެމެން މިދެކޭ ފަސޭހަ ދިރިއުޅުން ލިބިގެން ނުދާނެ ކަމަށް ފަހުމީ ވަނީ އިތުރަށް ވިދާޅުވެފަ އެވެ.

މި އަހަރުން ފެށިގެން، ކޮންމެ އަހަރެއްގެ އޮގަސްޓު މަހުގެ 30 ވަނަ ދުވަހަކީ ދިވެހިރާއްޖޭގެ އިންޖީނިއަރުންގެ ދުވަސް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ހަމަޖައްސަވައިފަ އެވެ. މި ދުވަސް ރާއްޖޭގެ އިންޖީނިއަރުންގެ ދުވަހުގެ ގޮތުގައި ރައީސް ހަމަޖެއްސަވާފައިވަނީ، ރާއްޖޭގައި މިހާތަނަށް ހިންގުނު އެންމެ ބިޔަ އުމްރާނީ ތަރައްގީގެ މަޝްރޫއު ކަމުގައިވާ، ސިނަމާލެ ބުރިޖުގެ އަމަލީ މަސައްކަތް ނިންމުމަށްފަހު އާންމުންނަށް ހުޅުވާލެވުނީ މިދުވަހުގައި ކަމުގައި ވާތީ އެވެ.

ރާއްޖޭގެ އިންޖީނިއަރުންގެ ދުވަހާއި ގުޅިގެން އަންނަ 2026 ވަނަ އަހަރުން ފެށިގެން އިންޖިނޭރުންގެ ގައުމީ އެވޯޑު، ސަރުކާރުން ދޭން ފަށާނެ ކަމަށް ރައީސް ޑރ. މުއިއްޒު ވަނީ ވިދާޅުވެފަ އެވެ.