އެމެރިކާގެ ރުހުމާއި އެކު ޖައްބާރު ނަތަންޔާހޫގެ އިސްރާއީލް ސަރުކާރުން ޣައްޒާގައި ހިންގަމުންދާ ޖަރީމާ ތަކުގައި ކުޑަކުދިންނާއި އަންހެނުންގެ ގުނަވަންތައް ބުރިވެ، ދާއިމީކޮށް ނުކުޅެދުންތެރިކަމާއި ކުރިމަތިލާން ޖެހިފައިވާ މީހުންގެ ޢަދަދު 78000 އަށް އަރާފައި ވާއިރު، އިސްރާއީލުން އަދިވެސް ގެންދަނީ ގަސްދުގައި ކުޑަކުދިންނާއި އަންހެނުންނަށް ޓާގެޓްކޮށް ޙަމަލާ ދެމުންނެވެ.

ރިޕޯޓްތައް ބުނާ ގޮތުގައި ދުވާލަކު 10 އާއި 12 ކުދިންގެ ގުނަވަންތައް އިސްރާއީލުން ދަނީ ބުރިކުރަމުންނެވެ. އެ މީހުން ކުޑަކުދިންގެ ގުނަވަންތައް ބުރިކުރަނީ ބަޑި ޖަހައިގެންނާއި ބޮން އަޅައިގެންނެވެ. ބައެއް ކުދިންގެ އެއް ގުނަވަން ނުވަތަ ދެ ގުނަވަން ގެއްލެމުންދާއިރު، ކޮންމެ ދުވަހަކު 15 ކުދިންނަށް އަނިޔާވެ ދާއިމީ ގޮތެއްގައި ނުކުޅެދުންތެރިކަމާއި ކުރިމަތިލާން ޖެހެއެވެ.

އިސްރާއީލުން ދިން އަނިޔާގެ ސަބަބުން ކަނާތު ފައި ބުރިވެ، ވާތު ފައި ބިންދާލުމުގެ ސަބަބުން ދާއިމީކޮށް ނުކުޅެދުންތެރިކަމާއި ކުރިމަތިލާން ޖެހިފައިވާ ކުޑަ ފިރުހެން ކުއްޖެއް ވީލްޗެއާގައި އިށީނދެގެން. / ފޮޓޯ: ރޮއިޓާސް.

ޣައްޒާގެ ހޮސްޕިޓަލްތަކާއި ކްލިނިކްތަކާއި ރިހެބިލިޓޭޝަން ސެންޓަރުތައް އިސްރާއީލު ޒައެނިސްޓުނން ހަލާކު ކޮށްލުމުގެ ސަބަބުން ޒަޚަމްވާ މީހުންނަށް އެކަށީގެންވާ ފަރުވާއެއް ނުދެވޭއިރު، މިހާރުވެސް ނުކުޅެދޭ %83 އަށްވުރެ ގިނަ މީހުންނަށް ފުރޮޅުލީ ގޮނޑި އާއި އަސާކޮޅު ވެސް ވަނީ ފޯރުކޮށް ނުދެވިފައި ކަމަށް ތުރުކީވިލާތުގެ ހިލޭސާބަހަށް މަސައްކަތްކުރާ ޖަމްޢިއްޔާއަކުން މިއަދު ބުންޏެވެ.

ބެންޖަމިން ނަތަންޔާހޫ މި ހުރިހާ ޖަރީމާތައް ފާޅުގައި ހިންގާ އިރުވެސް ގަދަކަމުން އޭނާ ހައްޔަރުކޮށްގެން ގެންގޮސް ޖަލަށް ލުމަށް ދުނިޔޭގެ އެއްވެސް ބަޔަކު މަސައްކަތެއް ނުކުރެއެވެ.