ރާއްޖެއަށް ފަތުރުވެރިކަން ތައާރަފު ކުރެއްވުމަށް، ބޮޑު ދައުރެއްް އަދާކުރެއްވި މުހައްމަދު އުމަރު މަނިކު (އެމްޔޫ މަނިކު) ގެ އެންމެ ފަހުގެ އުންމީދަކީ މިސްކިތެއް ބިނާކުރުން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް މިއަދު ވިދާޅުވެއްޖެ އެވެ.

އުމުރުން 78 އަހަރުގައި އެމްޔޫ މަނިކު ނިޔާވީ ސިއްހީ ހާލު ވަރަށް ބޮޑަށް ދެރަވެ، ސިންގަޕޫރުގެ މައުންޓް އެލިޒަބަތު ހޮސްޕިޓަލްގައި ފަރުވާ ހޯއްދަވަމުން ގެންދަވަނިކޮށް މިއަދު ހެނދުނުގެ ވަގުތެއްގަ އެވެ.

ދައުލަތަށް 19 އަހަރަށް ވުރެ ގިނަ ދުވަހު ހިދުމަތް ކުރެއްވި އެމްޔޫ މަނިކުއާ ގުޅިގެން ޝަހީމް ވިދާޅުވީ އެއީ އިޖުތިމާއީ ތައުލީމީ ކަންކަމާއި މީހުން ބިނާކުރެއްވުމަށް ވަރަށް އަހައްމިއްޔަތުކަން ދެއްވި ބޭފުޅެއް ކަމަށެވެ. މިސްކިތްތައް ބިނާކުރެއްވުމާއި މަރާމާތުކުރެއްވުމަށް އެމަނިކުފާނު އެހީތެރިކަން ދެއްވި ކަމަށް ޝަހީމް ވިދާޅުވި އެވެ.

ޝަހީމް ވިދާޅުވި ގޮތުގައި ސިއްހީ ހާލު ދެރަވެ ސިންގަޕޫރަށް ފުރުއްވުމުގެ ކުރިން ވެސް ވަނީ ހުޅުމާލޭ ސަރަަހައްދުގައި ބޮޑު މިސްކިތެއް ބިނާކުރެއްވުމަށް ބޭނުންފުޅުވާކަން ހާމަކުރައްވާ މިނިސްޓްރީއަށް ސިޓީއެއް ފޮނުއްވައިފަ އެވެ.

"އެމަނިކުފާނުގެ ހަޔާތުގެ އެންމެ ފަހުގެ އުންމީދަކީ ވެސް މިސްކިތެއް ބިނާކުރެއްވުމެވެ." ދައުލަތަށް 19 އަހަރަށް ވުރެ ގިނަ ދުވަހު ހިދުމަތް ކުރެއްވި އެމްޔޫ މަނިކާ ގުޅިގެން ޝަހީމް ވިދާޅުވި އެވެ.

އެހެންވެ، މިސްކިތަށް ބޭނުންވާ ޖާގަ ހުޅުމާލޭ ސަރަހައްދުން ހަމަޖައްސައިދީފައިވާ ކަމަށް ޝަހީމް ވިދާޅުވި އެވެ.