ޗައިނާ މޯލްޑިވްސް ފްރެޑްޝިޕް ބުރިޖަކީ ޗައިނާއާއެކު އޮތް ވަރުގަދަ ގުޅުމުގެ ހެއްކެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް މިބީދައިން ވިދާޅުވެފައިވަނީ ސިނަމާލެ ބުރިޖު ހުޅުވިތާ ހަތް އަހަރުފުރުމާ ގުޅިގެން އެމަނިކުފާނުގެ އެކްސްގައި މިއަދު ހިއްސާކުރެއްވި ޕޯސްޓެއްގަ އެވެ. އެމަނިކުފާނު ވިދާޅުވި ގޮތުގައި، ސިނަމާލެ ބުރިޖާއެކު ރާއްޖެއަށް އާ މަގުތަކެއް ހުޅުވިގެންދިޔަ އެވެ. އެއީ ހަގީގީ ޕާޓްނަޝިޕަކުން ހާސިލުކުރެވުނު އެ ފަހުރުވެރި ހެކިން ރާއްޖެއާއި އާއި ޗައިނާއާ ދެމެދު އޮންނަ އެއްބައިވަންތަކަމާއި އިތުބާރާއި ތަނަވަސްކަމުގެ ދިގުދެމިގެންދާ ގުޅުންތަކުގެ ފަހުރުވެރި ހެކިތަކެއްކަމަށް ރައީސް ވަނީ ވިދާޅުވެފަ އެވެ.
ސިނަމާލެ ބްރިޖު ހުޅުވައިފައިވަނީ ކުރީގެ ރައީސް އަބްދުﷲ ޔާމީންގެ ސަރުކާރުގައި 2018 ވަނަ އަހަރުގެ އޮގަސްޓް މަހުގެ 30 ވަނަ ދުވަހު އެވެ. އެ މަސައްކަތުގައި އެންމެ އިސް ދައުރެއް އަދާކުރެއްވި ބޭފުޅަކީ އޭރު ހައުސިން މިނިސްޓަރު ކަމުގެ މަގާމުގައި ހުންނެވި، އަދި މިހާރުގެ ރައީސް ޑރ. މުއިއްޒެވެ.
މި ބްރިޖުގެ މަސައްކަތްތަކަށް ޖުމްލަ 300 މިލިޔަން ޑޮލަރު ހަރަދު ކުރި އެވެ. އޭގެ ތެރެއިން 100 މިލިޔަން ޑޮލަރަކީ ޗައިނާ ސަރުކާރުގެ ހިލޭ އެހީ ގޮތުގައި ހަދިޔާކޮށްފައިވާ ފައިސާ އެވެ. އަދި 170 މިލިޔަން ޑޮލަރު ދިނީ ލޯނު އެހީގެ ގޮތުގަ އެވެ. ސިނަމާލެ ބުރިޖު މަޝްރޫއަށް ދިވެހި ސަރުކާރުން 30 މިލިޔަން ޑޮލަރު ހަރަދުކުރި އެވެ.
ސިންމާލެ ބުރިޖުގެ މެއިންޓެނަންސްގެ މަސައްކަތްތައްކޮށް ބަލަހައްޓަމުން އަންނަނީ ޗައިނާގެ ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ ލިމިޓެޑް (ސީސީސީސީ) ކުންފުނިންނެވެ.
