ޗައިނާގެ ރައީސް ޝީ ޖިންޕިންގގެ ދައުވަތަކަށް، ޝަންހާއީ ކޯޕަރޭޝަން އޯގަނައިޒޭޝަން (އެސް.ސީ.އޯ) ސަމިޓުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ޗައިނާއަށް ފުރާވަޑައިގެންފި އެވެ.
މި ދަތުރުފުޅުގައި ރައީސް މުއިއްޒު ޗައިނާގެ ރައީސް ޝީ ޖިންޕިންގ އާއި އެހެނިހެން ގައުމުތަކުގެ ލީޑަރުންނާ ބައްދަލުކުރައްވާނެ އެވެ. އަދި އެސް.ސީ.އޯ ސަމިޓުގެ މަތީ ފަންތީގެ ބައްދަލުވުންތަކުގައި ބައިވެރިވެވަޑައިގަންނަވާނެ އެވެ.
މޫސުމަށް އަންނަ ބަދަލުތަކާއި އިގްތިސާދީ ގޮންޖެހުންތަކާއި ޖިއޯޕޮލިޓިކަލް ނުތަނަވަސްކަން ފަދަ މައްސަލަތަކަށް ހައްލު ހޯދުމުގައި ބައިނަލްއަގުވާމީ އެއްބާރުލުމުގެ މުހިންމުކަމުގެ މައްޗަށް އަލިއަޅުއްވާލައްވައި އެސް.ސީ.އޯ ޕްލަސް ބައްދަލުވުމުގައި ބަޔާނެއް އިއްވެވުމަށްވެސް ހަމަޖެހިފައިވެ އެވެ.
އޭގެއިތުރުން ސެޕްޓެމްބަރު ތިންވަނަ ދުވަހު ފާހަގަކުރާ ޗައިނާގެ ވިކްޓަރީ ޑޭގެ ހަރަކާތްތަކުގައި ރައީސް މުއިއްޒު ބައިވެރިވެވަޑައިގަންނަވާނެ އެވެ. މި ރަސްމިއްޔާތަކީ ދެވަނަ ބޮޑު ހަނގުރާމައިގައި ޗައިނާއިން ޖަޕާނާ ދެކޮޅަށް ކުރި ހަނގުރާމައިގައި ލިބުނު ކާމިޔާބީ ފާހަގަކުރުމަށް ބާއްވާ ރަސްމިއްޔާތެކެވެ.
މި ރަސްމިއްޔާތުގައި އުތުރު ކޮރެއާގެ ލީޑަރު ކިމް ޖޮންގް-އުން، ޗައިނާގެ ރައީސް ޝީ ޖިންޕިންގް އަދި ރަޝިޔާގެ ރައީސް ވްލަދިމިރް ޕުޓިން ބައްދަލުކުރައްވާނެ އެވެ. މި ރަސްމިއްޔާތުގައި ޖުމްލަ 26 ގައުމެއްގެ ވެރިން ބައިވެރިވެވަޑައިގަންނަވާނެ ކަމަށް ޗައިނާއިން ވަނީ ހާމަކޮށްފަ އެވެ. މީގެ ތެރޭގައި ކެމްބޯޑިއާ، ވިއެޓްނާމް، ލާއޯސް، އިންޑޮނޭޝިއާ އަދި މެލޭޝިއާގެ އިސްވެރިންގެ އިތުރުން މެދުތެރޭ އޭޝިއާގެ ގިނަ ގައުމުތަކުގެ ވެރިން ހިމެނެ އެވެ.
