ހަރުދަނާ އާއިލާއެއް ބިނާކުރެވޭނީ ދީނާ ދުރު ފިކުރުތައް ގޭތެރޭގެ މާހައުލުން ނައްތައިލައިގެންކަމަށް މިއަދުގެ ހުކުރު ހުތުބާގައި ބުނެފި އެވެ.

ދީނުގައި އަންގަވާފައިވާ މެދުމިނާ ދުރު ފިކުރުތަކާއި، ދީނަށް އަމަލުނުކުރުމާއި، ދީނީ ޝިއާރުތަކަށް މަލާމަތްކޮށް ހަޖޫޖެހުމާއި، ދީނުގެ މައްޗައް ގީރަތްތެރިކަން ނެތުންފަދަ ކަންކަން އާއިލާގެ ތެރެއިން ނައްތައިލައި އިސްލާމް ދީނަކީ އަދުލުވެރި ދީންކަމާއި، އިސްލާމް ދީނަކީ ދިރިއުޅުމުގެ ސީދާ މަގުކަން ދަރިންނަށް ވިސްނައިދީ ނަފުސުތަކުގައި މިކަން ހަރުލައްވަންވާނެކަމަށް މިއަދުގެ ހުކުރު ހުތުބާގައި ވަނީ ބުނެފަ އެވެ.

މިއަދުގެ ހުކުރު ހުތުބާގައި ބުނެފައިވާ ގޮތުގައި ރަނގަޅު އާއިލާއެއް ބިނާކުރެވޭނީ ދަރިން ފުރާވަރަށް އެރުމުން ހުރިހާ ކަމެއް ހުއްދަވީކަމަށް ހީކުރާ ހީކުރުންތައް ދޫކޮށްލައިގެން ކަމަށެވެ. އަދި އުޅޭނެހައި ގޮތަކަށް ދަރިން އުޅެން ދޫކޮށްނުލައި، އިސްލާމީ ޝަރީއަތުގައި ކަނޑައަޅުއްވާފައިވާ އިމުން ބޭރުނުވެ، ހަޔާތުގެ ބައިވެރިޔާ އިހުތިޔާރުކުރުމަށް ދަރިންނަށް އިރުޝާދުދީގެންކަމަށް ހުތުބާގައި ވަނީ ބުނެފަ އެވެ. އަދި ރަނގަޅު އާއިލާއެއް ބިނާކުރެވޭނީ އިސްލާމީ އުސޫލުތަކުގެ މަތީގައި އާއިލާގެ ހުރިހާ މެންބަރުންގެ އަމަލުތައް ބަހައްޓައިގެންކަމަށް ވެސް ހުތުބާގައި ވަނީ ބުނެފަ އެވެ.

މިއަދުގެ ހުކުރު ހުތުބާގައި ބުނެފައިވާ ގޮތުގައި އިސްލާމީ އުންމަތުގެ ކުރިމަގު އުޖާލާކޮށް އުންމަތުގެ އިއްޒަތާއި ކަރާމާތް އަލުން އަނބުރާ އިއާދަކުރެވެން އޮތީ، މާތްވެގެންވާ އިސްލާމްދީނުގެ ތައުލީމާއި ތަރުބިއްޔަތުގެ ހިޔަލުގައި އާއިލާ ބައްޓަންކޮށްގެންނެވެ. އެހެންކަމުން ކޮންމެ މަޔަކާއި ބަފަޔަކުވެސް ދަރިން ތަރުބިއްޔަތުކުރުމުގައި އިސްލާމްދީން ގެނެސްދީފައިވާ މަންހަޖާ އެއްގޮތަށް އަމަލުކުރުމަކީ ކުރަންޖެހިފައިވާ މުހިއްމު މަސައްކަތެއްކަމަށް ހުތުބާގައިވަނީ އިތުރަށް ބުނެފަ އެވެ.

މިއަދުގެ ހުކުރު ހުތުބާގައި ދަރިންނަށް ތައުލީމުދީ ބަލައިބޮޑުކުރުމުގައި މައިންބަފައިން އިހުމާލުނުވުމަށް ވަނީ ނަސޭހަތްތެރިވެފަ އެވެ.