ރާއްޖޭގެ ނޫސްވެރިންނަށް، ދުނިޔޭގެ އެއްވެސް ގައުމެއްގެ ނޫސްވެރިންނަށް ނުލިބޭހާ މިނިވަންކަން ރައީސް ޑރ. މުއިއްޒުގެ ސަރުކާރުން ދެއްވާފައިވާކަން ހާމަވަމުންދާކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު ސައީދު މި މޭރުމުން ވިދާޅުވެފައިވަނީ މިއަދު އެކްސްގައި ހިއްސާ ކުރެއްވި ޕޯސްޓެއްގަ އެވެ. މިނިސްޓަރު ސައީދު ވިދާޅުވި ގޮތުގައި ރައްޔިތުންގެ މަޖިލީހުގެ ސުޕަ މެޖޯރިޓީއެއް ރައީސް ޑރ. މުއިއްޒަށް ލިބިފައި އޮތުމަކީ ވަރަށް ބޮޑު މަސްއޫލިއްޔަތެކެވެ. އެމަނިކުފާނު މިހާތަނަށް އެ މަސްއޫލިއްޔަތު އަދާކުރައްވާފައިވަނީ، ކުރީގެ އެހެން ސަރުކާރުތަކާ ހިލާފަށް، ފަރުވާތެރިކަމާއެކު އަދި ޑިމޮކްރެޓިކް އުސޫލުތަކަށް އިހްތިރާމްކުރައްވައިގެންކަމަށް މިނިސްޓަރު ސައީދު ވަނީ ވިދާޅުވެފަ އެވެ.
މިނިސްޓަރު ސައީދު ވިދާޅުވެފައިވާ ގޮތުގައި ރައީސް ޑރ. މުއިއްޒު ވެރިކަމަށް އިންތިހާބުވެވަޑައިގަތީ، ސާފު އަދި ކުރިމަގަށް ބަލާ މެނިފެސްޓޯއެއްގެ މައްޗަށް ބިނާކޮށް، ރައްޔިތުންގެ ވަރުގަދަ ތާއީދަކާ އެކުގަ އެވެ. އެމަނިކުފާނު ވެރިކަމުގެ މަސްއޫލިއްޔަތާ ހަވާލުވެވަޑައިގަތްއިރު، ކުރީ ސަރުކާރަށް ރާއްޖޭގެ އިގްތިސާދު މެނޭޖްކުރަން ނޭނގުމުގެ ސަބަބުން ގައުމުގެ ތާރީހުގައި ދިމާވި އެންމެ ނުރައްކާތެރި މާލީ ހާލަތާ ކުރިމަތިލާންޖެހުނުކަމަށް މިނިސްޓަރު ސައީދު ވިދާޅުވި އެވެ.
މިނިސްޓަރު ސައީދު ވިދާޅުވެފައިވާ ގޮތުގައި މީޑިއާގެ މިނިވަންކަމުގެ ނަމުގައި ކުރިއަށްގެންދާ މަގުމަތީ ހަރަކާތަކަކީ ސިޔާސީ މަގުސަދުތަކެއް އޮވެގެން ވަކި ބަޔަކު އިސްނަގައިގެން ކުރިއަށްގެންދާ ހަރަކާތެކެވެ.
ރާއްޖޭގެ ނޫސްވެރީންނަށް، ދުނިޔޭގެ އެއްވެސް ގައުމެއްގެ ނޫސްވެރިންނަށް ނުލިބޭހާ މިނިވަންކަން އަދުގެ ސަރުކާރުން ދީފައިވާކަން މިނިސްޓަރު ސައީދު ފާހަގަކުރައްވި އެވެ. އެގޮތުން:
- ހެނދުނުއްސުރެ ގްރީންޒޯންގައި ނޫސްވެރިން މުޒާހަރާކޮށް ބޭނުން ވަރަކަށް އަޑު އުފުލަމުން ދިޔަ
- ނޫސްވެރީންގެ ކަންބޮޑުވުން އަޑުއެއްސެވުމަށް އިންފޮމޭޝަން މިނިސްޓަރާއި ރައީސް އޮފީހުގެ ކޮމިޔުނިކޭޝަން މިނިސްޓަރު އެއްވެތިބި ނޫސްވެރީންގެ ތެރެއަށް ވަޑައިގެން ބައްދަލުކުރައްވާ ނޫސްވެރިންގެ ކަންބޮޑުވުންތައް އަޑުއެއްސެވި
- ކަންބޮޑުވުންތައް ދަންނަވަން އެދުނު ނޫސްވެރިންގެ އަޑު އެއްސެވުމަށް މޯލްޑިވްސް ޖާނަލިސްޓް އެސޯސިއޭޝަނާ ސީދާ ރައީސް ބައްދަލުކުރައްވައި ވާހަކަތައް އަޑުއެއްސެވި
- ރައްޔިތުންގެ މަޖިލީހަށް ހުށަހެޅިފައި އޮތް ބިލަށް ނޫސްވެރީން ބޭނުން ވަރަކަށް ހިޔާލުތަކާ އިސްލާހުތައް ހުށަހަޅަން 10 ދުވަހުގެ ފުރުސަތު ހުޅުވައިލި
- އޮފީސް ނިންމަވާފައި ރައީސް ހިންގަވާފައި މުލީއާގެއަށް ވަޑައިގަތް މަގުމަތީ، ނޫސްވެރީންގެ ބަޔަކު އެމަނިކުފާނުގެ ފަހަތްޕުޅުން ހިނގާ، އަޑުގަދަކޮށް، ހަށިކޮޅަށް އަތްލާ ހިސާބަށް ގެންދިއުމުންވެސް ސަރުކާރުން ކެތްތެރިކަން އިސްކުރި
- ނޫސްވެރިންގެ ސުވާލުތަކަށް ލައިވް ޕްރެސްއެއް ބާއްވަވައި ބަންޑާރަ ނައިބު ޖަވާބު ދެއްވި
- ބަންޑާރަ ނައިބުގެ ޕްރެސްގައި އިހުތިޖާޖުކޮށް ބޭނުން އަޑެއް އުފުލަންވެސް ނޫސްވެރިންނަށް ފުރުސަތު ދެއްވި
ރާއްޖޭގެ ނޫސްވެރިންނަށް، ދުނިޔޭގެ އެއްވެސް ގައުމެއްގެ ނޫސްވެރިންނަށް ނުލިބޭހާ މިނިވަންކަން އަދުގެ ސަރުކާރުން ދީފައިވާކަން ހާމަވަމުންދާކަމަށް މިނިސްޓަރު ސައީދު ވިދާޅުވެފައިވާއިރު ގިނަ އަދަދެއްގެ ނޫސްވެރިންތަކެއް ވަނީ އިއްޔެ އާއި މިއަދުވެސް މަޖިލީހަށް މިހާރު ހުށަހެޅިފައިވާ މީޑިއާ ބިލާ ދެކޮޅަށް އިހުތިޖާޖުކޮށްފަ އެވެ.
