އަބްދުއްރަހްމާންގެ މަރާ ގުޅިގެން ހައްޔަރު ކުރެވުނު އާޝިދުގެ ބަންދަށް އިތުރު 30 ދުވަސް ކޯޓުން ޖަހައިފި އެވެ.

މިދިޔަ ޖުލައި މަހުގެ 13 ވަނަ ދުވަހުގެ ރޭ އަނިޔާވެރިގޮތަކަށް އަބްދުއްރަހްމާން މަރާލި މައްސަލައާ ގުޅިގެން އާޝިދުގެ އިތުރުން ތިން މީހަކު ފުލުހުން ވަނީ ހައްޔަރުކޮށްފަ އެވެ. އެއީ އއ. މާޅޮސް، ލިލީފެހި، މުހައްމަދު ވިޝާމް (22އ) އަދި، އއ. މާޅޮސް ފިނިވާގެ، އަހްމަދު ފާރިސް (27އ) އެވެ. މި ތިން މީހުންގެ ތެރެއިން ވިޝާމާއި ފާރިސް ޝަރީއަތް ނިމެންދެން ބަންދުގައި ބަހައްޓަން މީގެކުރިން ކޯޓުން ވަނީ އަމުރުކޮށްފަ އެވެ.

ގިނަ ދުވަސްތަކަކަށްފަހު ފުލުހުންވަނީ އަބްދުއްރަހްމާނުގެ މަރުގެ މައްސަލައިގެ ތަހުގީގުގައި ބޮޑެތި ކުރިއެރުންތަކެއް ހޯދައިފަ އެވެ. އަބްދުއްރަހުމާންގެ މަރުގެ މައްސަލައިގެ ތަހުގީގުގައި އެކި އޭންގަލްތަކަށް ފޯކަސްކޮށްގެން ވަކިވަކި މަސައްކަތްތަކެއް ކުރަމުން ގެންދާ ކަމަށް ފުލުހުން މީގެކުރިން ބުނެފަ އެވެ.

އެގޮތުން އޭނާގެ އާއިލާއާއި، ގާތްގުޅުން އޮތް ފަރާތްތަކާ ވާހަކަދައްކައި ސުވާލުކޮށް، އެފަރާތްތަކުގެ އެއްބާރުލުމާއެކު، މި ހާދިސާގެ ވަށައިގެންވާ ހަގީގަތްތައް ހޯދައި ދެނެގަތުމަށްޓަކައި މަސައްކަތަކެއް ކުރަމުންދާ ކަމަށް ވެސް ފުލުހުން އޭރު ބުންޏެވެ.

އަބްދުއްރަހްމާން މަރުވެފައިވަނީ އޭނާގެ ބޮލަށް ލިބުނު ގެއްލުންތަކުގެ ސަބަބުން ކަމަށް، އޮޓޮޕްސީގެ ވަގުތީ ރިޕޯޓުގައި ފާހަގަކޮށްފައިވެ އެވެ.