ރައްޔިތުންގެ މަޖިލީހަށް ހުށަހަޅާފައިވާ މީޑިއާ ރެގިއުލޭޓުކުރާ ބިލާއި ގުޅިގެން ނޫސްވެރިން އިއްޔެ ކުރި މުޒާހަރާއާ ގުޅިގެން އެއްވެސް ނޫސްވެރިއަކު ހައްޔަރުނުކުރާކަމަށް ހޯމް މިިނިސްޓަރު އަލީ އިހުސާނު ވިދާޅުވެއްޖެ އެވެ.
އިއްޔެގެ މުޒާހަރާ ކުރަން ނޫސްވެރިން ފުރަތަމަ ފެށީ ރައްޔިތުންގެ މަޖިލިސް ކައިރީގަ އެވެ. އެއަށްފަހު ރައީސް އޮފީހާއި މުލިއާގެ ކައިރިއަށްވެސް އެއްވެ މީޑިއާ ބިލާއި ދެކޮޅަށް އަޑުއުފުލައި ރައީސް އާ ބައްދަލުކުރަން ޑިމާންޑުކުރި އެވެ.
ނަމަވެސް އެ ސަރަހައްދަކީ އެއްވެ އުޅިުން މަނާ "ގްރީން ޒޯން" ކަމަށްވާތީ ފުލުހުން ވަނީ ނޫސްވެރިން އެތަނުން ދުރަށްޖައްސައިފަ އެވެ. ބައެއް ނޫސްވެރިން ދުރަށް ގެންދިޔައީ ފުލުސް ވެހިކަލަކަށް އަރުވައިގެންނެވެ.
މުޒާހަރާއިން އެއްވެސް ނޫސްވެރިއަކު ހައްޔަރުނުކުރާ ކަމަށްބުނެ ބަޔާނެއްވެސް ފުލުހުން އިއްޔެ ނެރުނެވެ.
މުޒާހަރާއިން ހައްޔަރުކުރި ނޫސްވެރިން ދޫކޮށްލުމަށް ގޮވާލައި ކުރީގެ ރައީސް މުހައްމަދު ނަޝީދު މިއަދު ހެދުނު އެކްސްގައި ކުރެއްވި ޕޯސްޓަކަށް ރައްދު ދެއްވައި މިނިސްޓަރު އިހުސާނު ކުރެއްވި ޕޯސްޓެއްގައި ވިދާޅުވީ ނޫސްވެރިން އިއްޔެ ކަނޑައެޅިގެން ގާނޫނާއި ހިލާފުވީ ކަމަށާއި ނަމަވެސް އެކަމާއި ގުޅިގެން އެއްވެސް ނޫސްވެރިއަކު އިއްޔެ ހައްޔަރުނުކުރާ ކަމަށެވެ.
ގާނޫނާއި ހިލާފުވި ކަމަށް މިނިސްޓަރު ފާހަގަކުރެއްވީ ރައީސް އޮފީހާއި މުލިއާގެ ހިމެނޭ ސަރަހައްދަކީ ގްރީންޒޯނަށްވާތީ އެ ސަރަހައްދުގައި މުޒާހަރާކުރުމަކީ މަނާކަމަކަށް ވާތީ އެވެ.
އިހުސާނު ވިދާޅުވީ ނޫސްވެރިން އެ ސަރަހައްދުން ނެރުނީ އެތައް ފަހަރެއްގެ މަތިން އަނގަބަނުން އިންޒާރުދީ އިރުޝާދު ދިނުމަށް ފަހުގައި ކަމަށެވެ.
މަޖިލީހަށް ހުށަހަޅާފައިވާ ބިލު އޮތް ގޮތް އިސްލާހުކުރަން ރައީސް ޑރ. މުހައްމަދު މުއިއްޒު އަންގަވައި، މީޑިއާ ކޮންޓްރޯލް ކުރުމަށް އެމަނިކުފާނުގެ އެއްވެސް ޝައުގެއް ނެތްކަމަށް ވިދާޅުވެފައިވާއިރު ގާނޫނާ ހިލާފުވެ ރައީސުލްޖުމްހޫރިއްޔާގެ ގެކޮޅާއި އޮފީސްކުރަމިތީ އެގޮތަށް އެއްވެސް އަޑުގަދަ ކުރުމަކީ ދިވެހި ބައެއް ނޫސްވެރިންގެ ކިބައިން ފެނިގެންދިޔަ ވަރަށް ދަށުދަރަޖައިގެ ނާތަހުޒީބީ އަމަލެކެވެ. ނޫސްވެރިން ކަމުގައިވީ ނަމަވެސް އިހުތިޖާޖުކޮށް އަޑުއުފުލަން ޖެހޭނީ ދިވެހިރާއްޖޭގެ ގާނޫނު އަސާސީއާ ހިލާފުނުވާ ގޮތަށެވެ.
