ނެޓްފްލިކްސްގެ މަޝްހޫރު "ވަން ޕީސް" ސީރީސްގައި ސަންޖީގެ ދައުރު އަދާކޮށް ދުނިޔޭގެ މަޤުބޫލުކަން ހޯދާފައިވާ ތަރި ޓެޒް ސްކައިލާ، ރާއްޖެ އައިސްފި އެވެ. މި މިދަތުރުގައި ޓެޒް ސްކައިލާ ރާއްޖެ އިޝްތިހާރުކުރުމަށް ވަރަށް ބޮޑު ދައުރެއް އަދާކުރާނެ އެވެ.

ވިޒިޓް މޯލްޑިވްސްގެ ގްލޯބަލް އެމްބެސެޑަރެއްގެ ހައިސިއްޔަތުން ސްކައިލާ ރާއްޖެއަށް އައިސްފައިވަނީ، ވިޒިޓް މޯލްޑިވްސްގެ ގްލޯބަލް އެމްބެސެޑާޝިޕް ޕްރޮގްރާމުގެ ދަށުންނެވެ. "ވަން ޕީސް" ސިލްސިލާގެ ސްޓްރޯ ހެޓް ޕައިރޭޓްސްގެ ހުނަރުވެރި ކައްކާ ސަންޖީގެ ރޯލު ކުޅޭ ސްކައިލާ، އޭނާގެ އެމްބެސެޑަރޝިޕްގެ ތެރޭގައި ދިވެހިރާއްޖެ އިޝްތިހާރުކުރުމަށް ދެ ހަފްތާއަށް ވުރެ ގިނަ ދުވަސް ރާއްޖޭގައި ހޭދަކުރާނެ އެވެ.

މިގޮތުން، ސެޕްޓެމްބަރު މަހުގެ 14 އިން 27 އާ ހަމައަށް، ރާއްޖޭގެ ހިތްގައިމު ގުދުރަތީ ރީތިކަމާއި، ސަގާފީ މުއްސަނދިކަމާއި، ދެމެހެއްޓެނިވި ފަތުރުވެރިކަމުގެ އިތުރުން ހާއްސަކޮށް އެޑްވެންޗާ ފަތުރުވެރިކަމުގެ ފުރުސަތުތައް ޕްރޮމޯޓްކުރުމުގައި ހަރަކާތްތެރިވާނެ އެވެ.

ސްކައިލާގެ މި ދަތުރުގައި، ރާއްޖޭގެ އެކި ކަންކޮޅުތަކަށް ޒިޔާރަތްކޮށް، އެޑްވެންޗާ ފަތުރުވެރިކަން ޕްރޮމޯޓުކުރުމަށް ތަފާތު މޫދު ކުޅިވަރުތަކާއި ކަނޑުއަޑީގެ ހިތްގައިމުކަން ދައްކާލުމަށް ގިނަ ހަރަކާތްތަކެއްގައި ބައިވެރިވެ، އަމިއްލައަށް ތަޖުރިބާކުރާނެ އެވެ. ހަމަ އެއާއެކު، ދިވެހި ސަގާފަތާއި އާދަކާދަ ޕްރޮމޯޓްކުރުމަށްޓަކައި، މީހުން ދިރިއުޅޭ ރަށްރަށަށް ޒިޔާރަތްކޮށް، ދިވެހީންގެ ދިރިއުޅުމާއި އާދަކާދަ ގާތުން ތަޖުރިބާކުރުމަށްވެސް ވަނީ ހަމަޖެހިފަ އެވެ.

އިންސްޓަގްރާމްގައި 1.8 މިލިއަނަށްވުރެ ގިނަ ފޮލޯވަރުން ތިބި ސްކައިލާގެ ޕޯސްޓުތަކަށް އެވްރެޖްކޮށް 45،000 ލައިކް އަދި 300 އަށްވުރެ ގިނަ ކޮމެންޓް ލިބޭކަމަށް ވެއެވެ. މިފަދަ ނުފޫޒެއް އޭނާއަށް އޮތުމުން، ވިޒިޓް މޯލްޑިވްސްއަށް އާ ބައިނަލްއަގުވާމީ އޯޑިއަންސްތަކަކާ ހަމައަށް ރާއްޖޭގެ ގުދުރަތީ ރީތިކަމުގެ އިތުރުން، ދިވެހީންގެ އާދަކާދައާއި، ރާއްޖޭގެ ކަލިނަރީ އަދި އެޑްވެންޗާ ފަތުރުވެރިކަމުގެ ވާހަކަތައް، ދިވެހިވަންތަކަމާއި ޝައުގުވެރިކަމާއެކު ދައްކުވައިދިނުމުގެ ފުރުސަތު ލިބިގެންދާ ކަމަށް ވިޒިޓް މޯލްޑިވްސްއިން ފާހަގަކުރި އެވެ.

ސްކައިލާ ރާއްޖެ އައުމާއި ގުޅިގެން ވިޒިޓް މޯލްޑިވްސްގެ މެނޭޖިން ޑިރެކްޓަރު އިބްރާހިމް ޝިއުރީ ވަނީ އޭނާއަށް މަރުހަބާ ދަންނަވާފަ އެވެ. ޝިއުރީ ވިދާޅުވީ ސްކައިލާގެ ނުފޫޒާއި ވާހަކަ ކިޔައިދިނުމުގެ ހުނަރުން، ސަގާފީ، އެޑްވެންޗާ، އަދި ދިރިއުޅުމުގެ ވައްޓަފާޅީގެ ތަޖުރިބާތައް ލިބޭ މަންޒިލެއްގެ ގޮތުގައި ދުނިޔޭގެ އެކި ކަންކޮޅުތަކުގައި ދިވެހިރާއްޖެ އިޝްތިހާރުކުރުމަށް މަގުފަހިވެގެންދާ ކަމަށެވެ.

ސްކައިލާގެ މި ޒިޔާރަތް މެދުވެރިކޮށް، ވިޒިޓް މޯލްޑިވްސްއިން ކުރިއަށް ގެންދަނީ މުހިންމު މާކެޓްތަކުގައި ދިވެހިރާއްޖޭގެ ބްރޭންޑް އިތުރަށް ފުޅާކުރުމުގެ މަސައްކަތެކެވެ. މިގޮތުން، އާއިލާތަކާއި، ޒުވާން ދަތުރުވެރިންނާއި، އަދި އެޑްވެންޗާ ފަތުރުވެރިން ފަދަ ސެގްމަންޓްތަކަށް ވާސިލުވުމާއެކު، ދިވެހިރާއްޖޭގެ ޕްރިމިއަމް މަންޒިލެއްގެ ގޮތުގައިވާ މަގާމު ދެމެހެއްޓުމަށް މަސައްކަތްކުރާނެ ކަމަށް ވިޒިޓް މޯލްޑިވްސްއިން ބުންޏެވެ.