މިހާރު މަޖިލީހަށް ހުޅަހެޅިފައިވާ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލު މަޖިލީހަށް ބަލައިގަނެ، މިނިވަން މުއައްސަސާތަކުގެ ކޮމިޓީއަށް ދިރާސާ ކުރުމަށް ފޮނުވައިފި އެވެ.

ރައްޔިތުންގެ މަޖިލީހަށް މިބިލު ހުށަހެޅުއްވީ ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރެވެ. މަޖިލީހުން މިބިލު ބަލައިގަނެ މިނިވަން މުއައްސަސާތަކުގެ ކޮމިޓީއަށް ބިލު އިތުރަށް ދިރާސާ ކުރުމަށް ފޮނުވާފައިވާއިރު މިއަދު ވެސް މަޖިލިސް ކުރިމަތީގައި ނޫސްވެރިންތަކެއް ވަނީ އެބިލު މަޖިލީހަށް ބަލައިގަތުމާ ދެކޮޅަށް އަޑުއުފުލައިފަ އެވެ.

މިބިލު ރައްޔިތުންގެ މަޖިލީހުން ބަލައިގަތީ މަޖިލީހުގެ މެޖޯރިޓީ އޮތް ޕީއެންސީގެ 49 މެމްބަރުންގެ އިއްތިފާގުންނެވެ. މިބިލު މަޖިލީހަށް ބަލައިގަންނަން ނުފެންނަ ކަމަށް 12 މެމްބަރަކު ވަނީ ވޯޓު ދެއްވައިފަ އެވެ.

މިބިލާ އެކު މިނިވަން ނޫސްވެރިކަން ނެތިކޮށްލާނެ ކަމަށާއި މުޅި ބިލުގެ މަގުސަދަކީ މީޑިއާ ކޮންޓްރޯލްކުރުން ކަމަށް ބުނެ އިދިކޮޅަށް ނިސްބަތްވާ ފަރާތްތަކުން ދަނީ މިބިލާމެދު ދޮގު މައުލޫމާތު ފަތުރަމުންނެވެ. އެހެންނަމަވެސް މިބިލަށް ތާއީދުކުރައްވާ މަޖިލީހުގެ ގިނަ މެންބަރުންތަކެއް ވިދާޅުވެފައިވަނީ މިބިލުގެ ސަބަބުން ނޫސްވެރިން އިތުރަށް ބާރުވެރިވެގެންދާނެ ކަމަށެވެ.

މިކަމާއި ގުޅިގެން ރައީސް މުއިއްޒު މީގެކުރިން ވިދާޅުވެފައިވަނީ މީޑިއާ ކޮންޓްރޯލް ކުރަން އެމަނިކުފާނުގެ އެއްވެސް ޝައުގެއް ނެތް ކަމަށެވެ. އަދި މީޑިއާ ބިލުން ރައީސަށް ބާރުތައް ނުލިބޭ ގޮތަށް ބިލް ފާސްކުރަން މެންބަރުންނަށް އަންގަވައިފައިވާ ކަމަށް އެމަނިކުފާނު ވަނީ ވިދާޅުވެފަ އެވެ.