ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ކުޅުދުއްފުއްށި ސިޓީއަށް ވަޑައިގެން އެސިޓީގެ ރައްޔިތުންނާ ބައްދަލުކުރެއްވި ޖަލްސާގައި ފެނިގެން ދިޔައީ ޑިމޮކްރެޓިކް ވެރިއެއްގެ ފަރާތްޕުޅުން ފެންނާނެ އެންމެ ރީތި މިސާލު ކަމަށް މިސަރުކާރުގެ ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
މިނިސްޓަރު ޝިޔާމް މިމޭރުމުން ވިދާޅުވެފައިވަނީ އެކްސްގައި ހިއްސާކުރެެއްވި ޕޯސްޓެއްގަ އެވެ. އެގޮތުން ޝިޔާމް ކުރެއްވި ޕޯސްޓްގައި ވިދާޅުވެފައިވަނީ ކުޅުދުއްފުށި ސިޓީގެ މޭޔަރު މުހައްމަދު އާތިފަކީ ރައީސްގެ ސިޔާސަތުތަކަށް ވަރަށް ބޮޑަށް ފާޑުވިދާޅުވާ ބޭފުޅެއްކަން ކަނޑައެޅިގެން އެނގިވަޑައިގަންނަވާ ހާލުގައިވެސް، ރާއްޖޭގައި ވެރިކަންކުރެއްވި އެހެން ރައީސުންނާ ހިލާފަށް ރައީސް މުއިއްޒު ވަނީ، މޭޔަރަށް ޕޯޑިއަމުން ވަގުތުގެ ލިމިޓޭޝަނެއް ކަނޑައެޅުއްވުމެއްނެތި، ވާހަކަދައްކަވަން ފުރުސަތު ދެއްވާފައި ކަމަށެވެ.
މިއީ ރައީސްގެ ފަރާތްޕުޅުން ފެނިގެންދިޔަ އާދަޔާ ހިލާފު ޑިމޮކްރެޓިކް ރީތި ސިފަފުޅެއްކަން ފާހަގަކުރައްވައި ޝިޔާމް ވިދާޅުވީ، މިކަމުންވެސް ލާމަރުކަޒީ ނިޒާމަށް މިހާރު ޖާގަދެވިފައިވާ މިންވަރު ހާމަވެގެންދާކަމަށެވެ.
ޝިޔާމް ވަނީ ނިމިދިޔަ ސަރުކާރުގައި އޭރުގެ ރައީސް އިބްރާހިމް މުހައްމަދު ސާލިހް ނައިފަރަށް ވަޑައިގެންނެވި ރަސްމީ ދަތުރުފުޅުގައި، އެރަށު ކައުންސިލްގެ ރައީސް މުހައްމަދު ރަޝީދަކީ ސިޔާސީގޮތުން ހިޔާލު ތަފާތު ބޭފުޅަކަށްވީތީ ޖަލްސާގައި ވާހަކަ ދެއްކެވުމުގެ ފުރުސަތު ނުދެއްވި ދުވަހުގެ ހާދިސާއަށް ވެސް އަލިއަޅުއްވާލައްވައިފަ އެވެ. އެހެންކަމުން ރައީސް ޑރ. މުއިއްޒުގެ ސަރުކާރަކީ ރައްޔިތުންނަށް ފުރުސަތުދެވޭ ވެރިކަމެއްކަން ހާމަވެގެންދާކަމަށް ޝިޔާމް ވިދާޅުވި އެވެ.
ރައީސް ޑރ. މުއިއްޒު މިހާރު ރައްޔިތުންނާ ގާތަށް އަތޮޅުތެރެއަށް ކުރައްވަމުން ގެންދަވާ ދަތުރުފުޅު ނިމޭއިރު، އެމަނިކުފާނަށް ރާއްޖޭގެ މީހުން ދިރިއުޅޭ ހުރިހާ ރަށަކަށް ޒައާމަތުގެ ފުރަތަމަ ދެ އަހަރުތެރޭ މަދުވެގެން ދެ ފަހަރަށް ޒިޔާރަތްކުރެއްވޭނެކަމަށް ޝިޔާމް ވިދާޅުވި އެވެ. މީގެ އިތުރުން ރައީސްގެ މި ދަތުރުފުޅު ނިމޭއިރު، ދިވެހި ތާރީހުގައި ފަސް އަހަރުގެ ޒައާމަތެއްގައި ކުރިޔަށް ގެންދެވޭ އެންމެ ގިނަ މަޝްރޫއުގެ އަމަލީ މަސައްކަތްތައް ހުންނާނީ ފެށިފައިކަމަށްވެސް ޝިޔާމް ވަނީ އިތުރަށް ވިދާޅުވެފަ އެވެ.
