މިއަހަރުގެ ނޮވެމްބަރު މަހުން ފެށިގެން ކަށި މިޔަރުގެ މަސްވެރިކަން ކުރަން މަސްވެރިންނަށް ހުއްދަދޭން ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިމޭރުމުން ވިދާޅުވެފައިވަނީ، ހދ. އަތޮޅުގެ މީހުން ދިރިއުޅޭ ރަށްތަކަށް އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުގައި، ކުޅުދުއްފުށި ސިޓީއަށް ވަޑައިގެން އެ ސިޓީގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ. ކުޅުދުއްފުށި ސިޓީގެ ރައްޔިތުންނަކީ ކަށި މިޔަރުގެ މަސްވެރިކަން ކުރި ބައެއްކަން ފާހަގަކުރައްވައި ރައީސް ވިދާޅުވީ މިޔަރު މަސްވެރިކަމުގެ މަސައްކަތަކީ އެ ސިޓީގެ ރައްޔިތުން ރަނގަޅު އާމްދަނީއެއް ހޯދަމުންދިޔަ މަސައްކަތެއް ކަމަށެވެ.

ގަވާއިދުތަކަށް ގެނެވުނު ބަދަލުތަކާއެކު މިޔަރު މަސްވެރިކަމުގެ މަސައްކަތް ފަހުން ހުއްޓިގެންދިޔަ ނަމަވެސް، އެކަމާ ގުޅުންހުރި ގަވާއިދުތައް މުރާޖާ ކުރުމުގެ މަސައްކަތް ކަމާބެހޭ ފަރާތްތަކުން ކުރައްވާފައިވާކަމަށް ރައީސް ވަނީ ވިދާޅުވެފަ އެވެ. އަދި މެނޭޖްމަންޓް ޕްލޭންގެ ދަށުން ކަށި މިޔަރުގެ މަސްވެރިކަމަށް އަލުން ހުޅުވާލައްވަން ނިންމަވާފައިވާކަމަށް އެމަނިކުފާނު ވަނީ ވިދާޅުވެފަ އެވެ. އެހެންކަމުން ކަށިމިޔަރުގެ މަސްވެރިކަމަށް މަސްވެރިން ތައްޔާރުވުމަށް އެމަނިކުފާނު ވަނީ ގޮވާލައްވައިފަ އެވެ.

"އެހެންވީމާ މި މެނޭޖްމަންޓް ޕްލޭންގެ ދަށުން އެކެއް ނޮވެމްބަރުން ފެށިގެން ކަށި މިޔަރުގެ މަސްވެރިކަން ކުރަން ހުޅުވާލާނަން." --- ރައީސް ވިދާޅުވި އެވެ.

މިޔަރު މަސްވެރިކަމުގެ މަސައްކަތަށް ނުކުންނަން ބޭނުންވާ ފަރާތްތަކަށް އެ ފުރުސަތު ލިބިގެންދާނެކަމުގެ ޔަގީންކަންވެސް ރައީސް ވަނީ ދެއްވައިފަ އެވެ.

މިޔަރުގެ މަސްވެރިކަމަށް ކުރަން ހުއްދަ ދޭން ރައީސް ނިންމެވުމުން ގިނަބަޔަކު އަންނަނީ އެމަނިކުފާނުގެ އެނިންމެވުމަށް ތައުރީފްކުރަމުންނެވެ. ސަބަބަކީ ރާއްޖޭގައި މިޔަރުގެ އާބާދީ އިތުރުވެ މިޔަރު ހަމަލާ ދިނުން ފަދަ ހާދިސާތައް އިތުރުވަމުންއަންނަތީ އެވެ.