ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ހަރަދުގައި ރާއްޖެއިން ބޭރުގައި ކިޔެވުމަށް ފުރުސަތު ދިން މުވައްޒަފަކު، އެކުންފުންޏާއެކު ވެފައިވާ އެއްބަސްވުމާ ހިލާފުވެ، ކޯސް ފުރިހަމަ ނުކޮށް ވަޒީފާއިން ވަކިވުމާ ގުޅިގެން ހަތް ލައްކަ ރުފިޔާ ދައްކަން ސިވިލް ކޯޓުން އިއްޔެ ހުކުމްކޮށްފި އެވެ.

އެސްޓީއޯ އިން ސިވިލް ކޯޓުގައި ދައުވާކުރީ އެ ކުންފުނީގެ ސްޕޮންސާޝިޕްގައި 2010 ވަނަ އަހަރު ބެޗްލާސް އޮފް ސައިންސް އިން ފުޑް ސައިންސް އެންޑް ނިއުޓްރިޝަން ކޯހުގައި ބައިވެރިކުރެވުނު މުވައްޒަފު ކަމަށްވާ މަރްޔަމް ހަނާން އެ ކޯސް ފުރިހަމަނުކޮށް، ބޮންޑުގެ މުއްދަތުގައި ވަޒީފާއިން ވަކިވުމާ ގުޅިގެންނެވެ.

ސިވިލް ކޯޓުގެ ހުކުމުން އެނގޭ ގޮތުގައި، އެސްޓީއޯގެ ހަރަދުގައި ހިންގޭ ކޯސްތަކުގައި ބައިވެރިވުމަށް ރާއްޖެއިން ބޭރަށް ފޮނުވާ މުވައްޒަފުންގެ އެއްބަސްވުމުގައި އޭނާ ވަނީ ސޮއިކޮށްފައިވީ ނަމަވެސް އެސްޓީއޯއާއިއެކު ވެފައިވާ އެއްބަސްވުމާއި އޭނާ ހިލާފުވެފައިވާ ކަމަށް ސިވިލް ކޯޓުގެ ހުކުމުގައި ވަނީ ބުނެފަ އެވެ. އެހެންކަމުން، އެސްޓީއޯގެ ފަރާތުން ކޯޓުގައި އެދިފައިވަނީ، އެ ކޯހަށް އެސްޓީއޯއިން ކޮށްފައިވާ ހަރަދަށްވާ 770,311.06 ރުފިޔާ އެސްޓީއޯއަށް އަނބުރާ ދެއްކުމަށް މަރްޔަމް ހަނާން މައްޗަށް އަމުރުކޮށް ދިނުމަށެވެ.

މި މައްސަލައިގައި ދައުވާ ލިބޭ މަރްޔަމް ހަނާންއަށް މައްސަލައާ ގުޅޭ ލިޔެކިޔުންތަކާ ހަވާލުވެފައިވީ ނަމަވެސް، އޭނާ ދައުވާއަށް ޖަވާބުދާރީވުމަށް ކޯޓަށް ހާޒިރުވެފައި ނުވާކަމަށް ކޯޓުން ކޮށްފައިވާ ހުކުމުގައި ވަނީ ފާހަގަކޮށްފަ އެވެ.

އެސްޓީއޯގެ މުވައްޒަފު އެއްބަސްވުމާއި ހިލާފުވެ، ކޯސް ފުރިހަމަ ނުކޮށް، ބޮންޑުގެ މުއްދަތު ހަމަނުވަނީސް ވަޒީފާއިން ވަކިވެފައިވާތީ، އެސްޓީއޯ އިން ކުރި ހަރަދަށްވާ ހަތް ލައްކަ ރުފިޔާ، މިހިނގާ އޯގަސްޓު މަހުގެ 25 ވަނަ ދުވަހުން ފެށިގެން 14 ދުވަހުގެ ތެރޭގައި ކޯޓަށް ދައްކައި ހަލާސްކުރުމަށް ސިވިލް ކޯޓުގެ ހުކުމުގައި ވަނީ ބަޔާންކޮށްފަ އެވެ.