ފިނޭންސް މިނިސްޓަރުގެ އެޑްވައިޒަރުގެ މަގާމަށް ހަމްދޫން އަބްދުﷲ ހަމީދު އައްޔަނުކުރައްވައިފި އެވެ.
ފިނޭންސް އެންޑް ޕްލޭނިން މިނިސްޓްރީން ބުނެފައިވާގޮތުން ހަމްދޫން އެމަގާމަށް އައްޔަނުކުރައްވާފައިވަނީ އެ މިނިސްޓްރީގެ ދަށުން ހިންގާ ނެޝަނަލް ޕްލޭނިންގެ މަސައްކަތްތަކުގެ އެޑްވައިޒަރަކަށެވެ. އަދި ރާއްޖޭގެ 20 އަހަރުގެ ގައުމީ ތަރައްގީގެ ޕްލޭން ތަންފީޒު ކުރެއްވުމަށްޓަކައި ހަމްދޫން މަސައްކަތް ކުރައްވާނެ ކަމަށް ވެސް އެމިނިސްޓްރީން ވަނީ ބުނެފަ އެވެ.
ހަމްދޫން ހަމީދަކީ ސަރުކާރުގެ ބައެއް އިސް މަގާމުތަކެއް ވެސް ފުރުއްވާފައިވާ ބޭފުޅެކެވެ. އެގޮތުން ކުރީގެ ރައީސް މައުމޫންގެ ސަރުކާރުގައި އޭނާ ވަނީ ޕްލޭނިން މިނިސްޓަރުކަމުގެ މަގާމު ފުރުއްވައިފަ އެވެ. އަދި ކުރީގެ ރައީސް އަބްދުﷲ ޔާމީންގެ ސަރުކާރުގައި ރާއްޖެ އިން ސިންގަޕޫރަށް ކަނޑައަޅާފައިވާ ނޮން-ރެސިޑެންޓް ސަފީރަކަމުގެ މަގާމު ވެސް އޭނާ ފުރުއްވި އެވެ. މީގެ އިތުރުން ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރުކަން ވެސް ހަމްދޫން ކުރައްވާފައި ވެއެވެ.
މި ސަރުކާރުން ނެޝަނަލް ޕްލޭނިންގެ މަސްއޫލިއްޔަތުތައް ކުރިން ހައުސިން މިނިސްޓްރީއާ ހަވާލުކުރައްވާފައިވީ ނަމަވެސް، އެ މިނިސްޓްރީއާ ކުރިން ހަވާލުވެ ހުންނެވި ޑރ. އަލީ ހައިދަރު އަހުމަދު, ހަޔާ އެޑިޔުކޭޝަން މިނިސްޓްރީއަށް ބަދަލުކުރުމަށްފަހު، ޕްލޭނިންގެ ހުރިހާ މަސްއޫލިއްޔަތުތަކެއް ވަނީ ފިނޭންސް މިނިސްޓްރީގެ ދަށަށް ބަދަލުކޮށްފަ އެވެ.
ދިގު މުއްދަތަކަށް ރާއްޖެ ތަރައްގީކުރުމަށް ނެޝަނަލް ޕްލޭނެއް އެކުލަވާލުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ. މި ވައުދުފުޅު ފުއްދެވުމުގެ ގޮތުން މި މަސައްކަތް މިހާރު ވަނީ ބަޔަކާ ހަވާލުވެސް ކޮށްފަ އެވެ.
