މީގެ ހަތަރު އަހަރު ކުރިން ގއ. މާމެންދޫގައި ހިންގި މާރާމާރީއެއްގައި އެ ރަށު އަހްމަދު އުދައްޔު މަރާލި މައްސަލާގައި، ދެ މީހެއްގެ މައްޗަށް ކުއް ސާބިތު ވެއްޖެ އެވެ.
މިއަދު ކްރިމިނަލް ކޯޓުގައި ބޭއްވި އަޑުއެހުމެއްގައި ބުނީ އުދައްޔު މަރާލި ކަމަށް ކުއް ސާބިތުވެފައިވަނީ އަހުމަދު ޝަމީމް، ރިހިފަރުދާގެ/ގއ. މާމެންދޫ، މުހައްމަދު މާޒިން، ގުލްފާމްގެ/ގއ. މާމެންދޫ އަށް ކަމަށެވެ.
މި މައްސަލައިގައި މީގެ އިތުރުން 18 އަހަރު ނުފުރޭ ކުޑަކުއްޖެއްވެސް ހިމެނެ އެވެ. ނަމަވެސް އެ ކުއްޖާގެ މައްޗަށް ކުއް ސާބިތުވާ ކަމަށް މީގެ ތިން އަހަރު ކުރިން ވަނީ ކަނޑައަޅައިފައި އެވެ. އޭނާގެ މައްޗަށް އޭރުވަނީ، 25 އަހަރު ބަންދުގައި ބެހެއްޓުމަށާއި މަރުގެ ދިޔައިގެ ގޮތުގައި 1 މިލިއަން ރުފިޔާ ދައްކަން ކްރިމިނަލް ކޯޓުން ހުކުމް ކޮށްފަ އެވެ.
ދައުވާތަކާ މެދު ގޮތެއް ނިންމަވަމުން، ގާޒީ ފާހަގަކުރެއްވި ގޮތުގައި 17 އަހަރުގެ އުދައްޔު މަރުވި ހަމަލާދީފައި ވަނީ އެ ޒުވާނާ އެވެ. އޭނާއާ އެކު އެއް ޖަމާއްތެއްގެ ގޮތަށް، އެކަކު އަނެކަކަށް ވާގިދީ، އެހީތެރިކަން ދޭ އުސޫލުން މާޒިން އާއި ޝަމީމް އެކުގައި ބައިވެރިވެފައިވާ ކަމަށް ވިދާޅުވި އެވެ.
ގާޒީ ވިދާޅުވި ގޮތުގައި މި ތިން މީހުން، "ކޭވަނެބެއްޔާ" މަގާއި "ކަތިއްބެއްޔާ" މަގާ ގުޅުނު ހަތަރު އަނގޮޅީގައި އެކުގައި މާރާމާރީ ހިންގަން އުޅުނެވެ. އަދި ވަޅި އާއި ތޫނު އެއްޗެއް ހިފައިގެން އެ ތިން މީހުންވެސް އުދައްޔުއާ މާރާމާރީ ހިންގި ކަމަށް ގާޒީ ވިދާޅުވި އެވެ. އެގޮތުން ގަސްތުގައި މީހަކު މަރާލުމުގައި އެ ތިން މީހުންވެސް ބައިވެރިވެފައިވާ ކަމަށް ސާބިތުވާކަމަށް ގާޒީ ވިދާޅުވި އެވެ.
އުދައްޔު މަރާލުމުގެ ދައުވާ އިތުރުޒުވާނެއް ކަމުގައިވާ ޝަރަފް ރަޝީދުގެ މައްޗަށްވެސް ބައިވެރިވެފައިވާ ކަމަށް ސާބިތުވެ އެވެ.
