ހދ. އަތޮޅުގައި ޓޫރިޒަމް ފައްކާކުރުމަށްޓަކައި ވަރަށް ގިނަ މަސައްކަތްތަކެއް ކުރަމުން އަންނަ ކަަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިމޭރުމުން ވިދާޅުވީ އެމަނިކުފާނު މިހާރު ހދ. އަތޮޅަށް މިހާރުކުރައްވަމުން ގެންދަވާ ދަތުރުފުޅުގައި، މިއަދު އެ އަތޮޅު ނާވައިދޫައަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ. ހދ. އަތޮޅުގައި ޓޫރިޒަމް ނެތް ކަމަށް އޮންނަ ލޭބަލް ކަނޑުވާލަދެއްވާނެ ކަމުގެ ޔަގީންކަން ރައީސް ވަނީ އެ އަތޮޅުގެ ރައްޔިތުންނަށް ދެއްވައިފަ އެވެ.

ހދ. އަތޮޅުގެ ރަށްރަށުގައި ލޯކަލް ޓޫރިޒަމް ކުރިއަށް ގެންގޮސް، އެ އަތޮޅުގައި ޓޫރިޒަމް ކުރިއެރުވުމަކީ މިހާތަނަށް އެ ނުވެ އޮތް ކަންތައްކަން ފާހަގަކުރައްވައި އެމަނިކުފާނު ވިދާޅުވީ ހދ. އަތޮޅާއި، އެފަދަ ޓޫރިޒަމްގެ ސިނާއަތް މަދު އެހެން އަތޮޅުތަކަށް އިންވެސްޓު ކުރާ އިންވެސްޓަރުންނަށް ބޮޑެތި ލުއިތަކަކާ އެކު އިންވެސްޓުމެންޓަށް މިހާރު ހުޅުވާލެވިފައިވާ ކަމަށެވެ.

ހދ. އަތޮޅުގައި ރިސޯޓު ތަރައްގީ ކުރުމަށް އެމްޓީޑީސީއަށް ދޫކޮށްފައިވާ އެ އަތޮޅު ނާގޯށީގެ މަސައްކަތުގެ އެންމެފަހުގެ މައުލޫމާތަށް ވެސް ރައީސް ވަނީ އަލިއަޅުއްވާލައްވައިފަ އެވެ. އެގޮތުން ފިިނޭންސް މިނިސްޓްރީ މެދުވެރިކޮށް ބީއެމްއެލް ތެރެއިން މަގުތަކެއް ފަހިކޮށްދީގެން އެމްޓީޑީސީން ނާގޯށީގެ މަސައްކަތް ފަށަން މިިހާރު މޮބިލައިޒް ކޮށްފައިވާ ކަމަށް އެމަނިކުފާނު ވަނީ ވިދާޅުވެފަ އެވެ.

"އެއީ ވަރަށް ދުވަސްވީ މައްސަލައެއް. ނުހިނގާ، ކުރަން އުޅެ ނުވެފައި. އެހެން ނަމަވެސް، މިހާރު މި މަސައްކަތް މިވަނީ ބާރު ސްޕީޑުގައި ގެންދެވޭނެ ގޮތް އަޅުގަނޑުމެން ފަހިކޮށްދީފައި،" ރައީސް ވިދާޅުވި އެވެ.

ހދ. އަތޮޅަކީ ރާއްޖޭގައި ރިސޯޓުތަކާއި ލޯކަލް ޓޫރިޒަމް އެންމެ މަދު އަތޮޅުތަކުގެ ތެރޭގައި ހިމެނޭ އެއް އަތޮޅެވެ.