ނާވައިދޫ ބިންހިއްކުމުގެ މަޝްރޫއު އެމްޓީސީސީއާ ހަވާލުކޮށްފި އެވެ.

ނާވައިދޫ ރައްޔިތުންނާއި ވާހަކަ ދައްކަވަމުން ރައީސް ވިދާޅުވީ މި މަޝްރޫއުގެ ސަބަބުން އެ ރަށަށް އިގްތުސާދީގޮތުން ކުރި އެރުމާއި ފަސޭހަތަކެއް ލިބިގެން ދާނެ ކަމަށެވެ.

އަދި އެ މަޝްރޫއުގެ އިތުރުން ޒުވާނުންނަށް ފުޓުބޯޅަ ދަނޑުގެ މަސައްކަތުގެ ބިޑް ޕްރޮސެސް ނިންމުމަށް ފަހު އެ މަސައްކަތަށް ބަޔަކު ހޯދައިފައިވާނެ ކަމަަށް ރައީސް ވިދާޅުވި އެވެ.އަދި ވަރަށް އަވަހަށް އަމަލީ ގޮތުން މަސައްކަތް ފެށިގެންދާނެ ކަމަށް ރައީސް ފާހަގަކުރެއްވި އެވެ.

ހަމަ އެއާއެކު ސްކޫލް ތަރައްގީ ކުރުމުގެ މަސައްކަތް މަޑު ޖެހިފައި އޮތް ނަމަވެސް ދެން އެމްޓީސީސީއިން ބާރު ސްޕީޑުގައި މަސައްކަތް ކުރިއަށް ގެންދާނެ ކަމަށް ރައީސް ވިދާޅުވި އެވެ.

އަދި އެ ރަށުގެ ރައްޔިތުން ބޭނުންވެލައްވާ ގޮތަށް ރަށުގެ ބަނދަރުގެ ޖާގަ އިތުރުކޮށް ބޭނުންވާ ބަދަލުތަކާއި އެކު ބަނދަރުހަދާ ނިންމައިދޭނެ ކަމުގެ ޔަގީންކަން ރައީސް ދެއްވި އެވެ.

އިތުރަށް ރައީސް ވިދާޅުވީ ސަރުކާރުގެ ފަރާތުން ސަމާލުކަން ދީގެން ފައިސާގެ ދަތިކަމެއް ނުވާނެހެން ވަރަށް ގާތުން އެ މަޝްރޫއުގެ ކަންތައް ބަލަމުން ގެންދާނެ ކަމަށާއި، ދާދި އަވަހަށް މަސައްކަތް ނިންމާނެ ކަމަށް ރައީސް ވިދާޅުވި އެވެ.

މީގެ އިތުރުން އަންނަ އަހަރުގެ ބަޖެޓުގައި ހިމަނައިގެން ހޮސްޕިޓަލުގެ އާ އިމާރާތެއް ގާއިމުކުރުމާއި، ޖާގަ އިތުރު ކުރުމާއި، ވަސީލަތްތައް ގެނެސް ލެބޯޓަރީ ހަދާދޭނެ ކަމަށް ރައީސް ވިދާޅުވި އެވެ. އަދި އެމްބިއުލޭންސް ގެ ދަތިކަމަށް ހައްލު ހޯދައިދީ މަގު ހެދުމުގެ މަޝްރޫއު ވެސް އެ ބަޖެޓުގައި ހިމަނައިގެން ކުރިއަށް ގެންދާނެ ކަމަށް ރައީސް ވިދާޅުވި އެވެ.