ހދ. އަތޮޅުގެ ރައްތަކަށް ކުރައްވަމުންދާ ދަތުރުފުޅުގައި އެ އަތޮޅުގެ ހަަނިމާދޫއަށް ވަޑައިގެން، ރައީސް ހަނިމާދޫގައި އަޅަން ނިންމައިފައިވާ ހޮސްޕިޓަލްގެ ބިންގާ އަޅައިފި އެވެ.

އެ ރަށު ހޮސްޕިޓަލްގެ ބިންގާ މިއަދު އަޅުއްވައިދެއްވީ ހެލްތު މިނިސްޓަރު އަބްދުﷲ ނާޒިމެވެ. އާރްޑީސީއާ ހަވާލުކޮށްފައިވާ މި މަޝްރޫއުގެ އަގަކީ 104,834,778.55ރ. އެވެ.

ދެހާސް ފައްސަތޭކައެއްހާ މީހުން ދިރިއުޅޭ އެ ރަށުގައި އަޅަން ނިންމާފައި ވަނީ 30 އެނދުގެ ހޮސްޕިޓަލެކެވެ. ރޭ ހަނިމާދޫ ރައްޔިތުންނާ ވާހަކަ ދައްކަވަމުން ރައީސް ވިދާޅުވީ މި އަހަރު ނިމުމުގެ ކުރިން މިހާރު ހުރި ސިއްހީ މަރުކަޒުގައި ޑަޔަލިސިސްގެ ހިދުމަތް ވެސް ފައްޓަވައި ދެއްވާނެ ކަމަށެވެ.

އޭގެ އިތުރުން އަންހެނުންގެ ހާއްސަ ޑޮކްޓަރަކާއި ކުޑަކުދިންގެ ޑޮކްޓަރެއްގެ ހިދުމަތް ލިބޭނެ ގޮތް ވެސް ހަމަޖައްސަވައިދެއްވާނެ ކަމަށް ރައީސް ވިދާޅުވި އެވެ.

އަދި ހަނިމާދޫ ހޮސްޕިޓަލް ހިމެނެނީ ކުވެއިތު ފަންޑު ފޯ އަރަބް އިކޮނޮމިކް ޑިވެލޮޕްމަންޓުގެ އެހީގައި ހަތް ރަށެއްގައި ހޮސްޕިޓަލް އެޅުމަށް 2022 ވަނަ އަހަރު އިއުލާނުކުރި ޕްރޮޖެކްޓު ތެރޭގަ އެވެ. ހަނިމާދޫ ހޮސްޕިޓަލްގެ މަސައްކަތް މީގެ ކުރިން 2023 ވަނަ އަހަރު އަމިއްލަ ކުންފުންޏަކާ ވެސް ހަވާލުކޮށްފައިވެ އެވެ.

ހަތް ރަށުގެ ހޮސްޕިޓަލްތަކަށް 686،089،524.22ރ. ކުވައިތު ފަންޑުން ހޭދަކުރަން ނިންމާފައި ވާއިރު ހަނިމާދޫގެ އިތުރުން ށ. މިިލަންދޫ، ނ. ވެލިދޫ، ކ. ތުލުސްދޫ، އދ. މާމިގިލި، ވ. ފެލިދޫ އަދި ތ. ވިލުފުށީގައި ވެސް ހޮސްޕިޓަލް އަޅަން ނިންމައި އެ މަސައްކަތް އެކި ކުންފުނިތަކާ ހަވާލުކުރި އެވެ.