އުންމަތުގެ މުސްތަގުބަލު އުޖާލާވާނީ، އިސްލާމީ ނިޒާމާ އެއްގޮތަށް މުޖުތަމައުގެ އެންމެހައި އަފުރާދުން ފުހިހަމައަށް ބައްޓަންވެގެންކަމަށް މިއަދުގެ ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގައި ބުނެފައިވާ ގޮތުގައި، އިސްލާމީ އުންމަތަށް ހުޅުވާލެވިފައިވާ އެންމެ ފަހި ފުރުސަތަކީ މުސްލިމް ޒުވާނުން، އިސްލާމްދީނާއި އިސްލާމީ ޝަރީއަތާ ގާތްކުރުމަށް ހުޅުވާލެވިފައިވާ ފަހި ފުރުސަތުކަމަށާ، އިސްލާމީ ޝަރީއަތުގެ ރިވެތިކަމާ ފުރިހަމަކަމާ މެދު އެ ޒުވާނުން ހޭލުންތެރިކުރުމުގެ ފަހި ފުރުސަތުކަމަށް ހުތުބާގައި ވަނީ ބުނެފަ އެވެ.

އެހެންނަމަވެސް އިސްލާމީ ޝަރީއަތުގެ ރިވެތިކަމާ ފުރިހަމަކަމަށް ބީރައްޓެހިވުމުގެ ސަބަބުން އަހަރެމެންގެ އަގީދާއާއި އީމާންތެރިކަމުގެ ރޫހާ ދުރު މަގުތަކަށް ބައެއް ޒުވާނުން ކަސިޔާރު ވަމުންދާކަމަށް ހުތުބާގައި ވަނީ ބުނެފަ އެވެ. އަދި މިކަމާ މާޔޫސްވުމުގެ ބަދަލުގައި ރިވެތިގޮތުގައި ނަސޭހަތްތެރިވެ، އިލްމާއި ހިކުމަތާއި، އޯގާތެރިކަމާއެކު އެފަދަ ޒުވާނުންނަށް ހެޔޮމަގު ދައްކައިދޭން ޖެހޭނެ ކަމަށާ، މިކަމަކީ ފަރުދީގޮތުން ކޮންމެ މުސްލިމަކުވެސް އުންމަތައްޓަކައި އަދާކޮށްދޭންޖެހޭ ވާޖިބެއްކަމަށް ހުތުބާގައި ވަނީ ބުނެފަ އެވެ.

މިއަދުގެ ހުތުބާގައި ބުނެފައިވާ ގޮތުގައި، އިސްލާމްދީނުގެ އަދުއްވުން ޒަމާނީ އެކިއެކި ވަސީލަތްތަކުގެ އެހީގައި، މުސްލިމުންނާއި، އިސްލާމްދީނާ މެދު ދޮގުތައް ފަތުރައި ޝައްކުއުފައްދަމުންދާކަމަށާ، މިކަމުގެ ވިހަ އަސަރު ތައުލީމާއި ތަރުބިއްޔަތަށް ފޯރާކަމަށެވެ. އަދި މިކަމުގެ ސަބަބުން ޅަދަރިންގެ ސިކުނޑިތައް ދޮވެވި، އެކުދިން ފިތުރަތުގެ މަގާ ދުރަށްގޮސް، މާއްދިއްޔަތަށް ގޮސް ހުސްވަމުންދާކަމަށް ހުތުބާގައި ވަނީ ބުނެފަ އެވެ.

އިސްލާމީ ޝަރީއަތުގެ ވާހަކަދެއްކުމުން ގިނަ ބަޔަކަށް ވިސްނެނީ އެއީ ވައްކަންކުރާ މީހާގެ އަތްކެނޑުމާއި، ޒިނޭކުރާ މީހާ ރަޖަމްކުރުމާއި، މީހެއްގެ ލޭ އޮހުރުވައިފި މީހާގެ ކިބައިން ގިސާސް ހިފުންކަމުގައި މިއަދުގެ ހުކުރު ހުތުބާގައި ވަނީ ބުނެފަ އެވެ. އެހެންނަމަވެސް ހަގީގަތަކީ އިސްލާމީ ޝަރީއަތުގެ ބިންގަލުގެ މަތީގައި މުޖުތަމައެއް ބިނާވެއްޖެނަމަ މިނިވަންކަމާއި، އަމާންކަމާއި، ތަރައްގީއާއި، ކުރިއެރުން އެ މުޖުތަމައަކަށް ލިބިގެންދާނެކަމަށް ހުތުބާގައި ވަނީ ބުނެފަ އެވެ.

މުސްލިމުން އިސްލާމީ ޝަރީއަތުގައި ސާބިތުވެ އެއްބައިވަންތަކަންމަތީ ތިބި ދުވަސްވަރު އިސްލާމީ އުންމަތަކީ އާރާއި ބާރު ހުރި އުންމަތެއް ނަމަވެސް، މިއަދު މުސްލިމުން ބައިބައިވެ، ދުޝްމަނުންގެ ކުރިމަތީގައި ނިކަމެތިވުމުގެ ސަބަބަކީ އިސްލާމީ ތައުލީމާއި، އިސްލާމީ ޝަރީއަތާ ދުރުވެ ބީރައްޓެހިވުންކަމަށް ހުތުބާގައި ވަނީ ބުނެފަ އެވެ. އަދި އުންމަތުގެ އިއްޒަތާއި ގަދަރު އަނބުރާ ލިބޭނީ ﷲގެ މަގަށް މީސްތަކުން އެނބުރިގެންކަމަށް ހުތުބާގައި ވަނީ ބުނެފަ އެވެ.