އެކުއަކަލްޗާގެ މަސައްކަތްތައް ކުރުމަށް ފަޅުރަށް ދޫކުރުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ހުޅުވާލައިފި އެވެ.

މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން އެކުއަކަލްޗާގެ މަސައްކަތްތައް ކުރުމަށް ދޫކުރުމަށް ހުޅުވާލީ ފަސް ފަޅުރަށާއި ދެ ފަޅެކެވެ. އެކުއަކަލްޗާގެ މަސައްކަތްކުރުމަށް މިނިސްޓްރީން ހުޅުވާލި ރަށްތަކާއި ފަޅުތަކުގެ ތެރޭގައި ހަތް ތަނެއް ހިމެނެ އެވެ. އެ ހަތް ތަނަކީ ހދ. ހިރިނައިދޫ، ރ. މާދޫނިފަރު، ރ. ދިގުފަރު، ރ. ފަސްގަނޑުފަރު، މ. ވަންނެރު ފަސްގަނޑު، މ. އަތޮޅުގެ ފަޅެއްގެ އިތުރުން ތ. އަތޮޅުގެ ފަޅެކެވެ.

މި މަސައްކަތް ކުރުމަށް ދޫކުރާ ފަޅުރަށްތަކާއި ފަޅުތައް ދޫކުރާނީ 21 އަހަރު ދުވަހުގެ މުއަދަތަކަށެވެ. މި މަސައްކަތަކީ ރާއްޖޭގެ މަސްވެރިކަމުގެ ދާއިރާ މިހާރަށްވުރެ އިތުރަށް ހަރުދަނާ ކުރުމަށް ސަރުކާރުން ގެންގުޅޭ ސިޔާސަތުގެ ދަށުން ކުރެވޭ މަސައްކަތެއްކަން ފާހަގަކޮށްލަންޖެހެ އެވެ.

ފިޝަރީޒް މިނިސްޓްރީން ދޫކުރުމަށް ހަމަޖެހިފައިވާ ރަށްތަކަށް ބީލަން ހުށަހެޅުމުގެ މުއްދަތު މި އަހަރުގެ ނޮވެންބަރު މަހުގެ ހަވަނަ ދުވަހުގެ ނިޔަލަށް ވަނީ ހުޅުވާލައިފަ އެވެ. މި ބީލަމާ ގުޅޭ ޑޮކިއުމަންޓް ވިއްކުން މިއަހަރުގެ އޮކްޓޫބަރު މަހުގެ 30 ވަނަ ދުވަހުގެ ނިޔަލަށް ކުރިއަށް ގެންދިއުމަށް ވަނީ ހަމަޖެހިފަ އެވެ. ބިޑް ޑޮކިއުމަންޓެއްގެ އަގަކީ 20,000 ރުފިޔާ އެވެ.

މިކަމަށް ޝައުޤުވެރިވާ ފަރާތްތަކަށް މައުލޫމާތު ފޯރުކޮށްދިނުމަށްޓަކައި، މިއަހަރުގެ ސެޕްޓެމްބަރު މަހުގެ 22 ވަނަ ދުވަހު މައުލޫމާތު ދިނުމުގެ ބައްދަލުވުމެއް ބޭއްވުމުގެ އިތުރުން، މިކަމަށް ޝައުގުވެރިވާ ފަރާތްތަކަށް، ބީލަމަށް ހުށަހެޅޭ ރަށްތައް ބަލައިލުމުގެ ފުރުސަތު ދިނުމަށް ފިޝަރީޒް މިނިސްޓްރީން ވަނީ ނިންމައިފަ އެވެ.