އއ. އުކުޅަހުގައި ހިއްކި ބުމުން ދޫކުރާ ގޯތީގެ އަދަދު އިތުރުކޮށް، 50 ހައުސިން ޔުނިޓް އަޅަން މިއަހަރު ބަޔަކާ ހަވާލުކުރަން ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ރައީސް މިހެން ވިދާޅުވީ އއ. އަތޮޅަށް މިހާރު ކުރައްވާ ދަތުރުފުޅުގައި އެންމެ ފަހު ރަށެއްގެ ގޮތުގައި އުކުޅަހަށް ވަޑައިގެން އެ ރަށު ރައްޔިތުންނާ ރޭ ވާހަކަ ދައްކަވަމުންނެވެ.
ރަށުގެ ބިން ހިއްކުމުގެ މަޝްރޫއާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ އެ މަޝްރޫއު ފުރިހަމަވެގެންދާއިރު ބޯހިޔާވަހިކަމުގެ ދަތިކަމަށް ވިސްނަން ޖެހޭ ކަމަށެވެ.
Advertisement
މިހާރު ހަދާފައި އޮތް ލޭންޑް ޔޫސް ޕްލޭންގައި ގޯތީގެ ޖާގަ ނަގަންޖެހޭ މިންވަރަށް ނަގާފައި ނެތް ކަމަށާއި އޭގައި ކަނޑައަޅާފައި އޮތީ 174 ގޯތި ދޭން ކަމަށް ރައީސް ވިދާޅުވި އެވެ.
ބާކީ ހުރި ޖާގަތައް ވެސް ކަނޑައަޅާފައި ހުރީ ލޯކަލް ޓޫރިޒަމަށް ނަމަވެސް އެ ބިމުން އިތުރު 76 ގޯތި ދޫކުރަން ނިންމާފައިވާ ކަމަށް ރައީސް ވިދާޅުވި އެވެ.
"އަޅުގަނޑު ގަބޫލުކުރާގޮތުގައި ރަށުގެ ރައްޔިތުންނަށް އެންމެ މުހިންމީ ގޯތިގެދޮރުގެ މައްސަލަ ހައްލުކުރުން. ލޯކަލް ޓޫރިމަށް ކަނޑައަޅާފައިވާ ބިންތައް ސަރުކާރުން ލޭންޑް ޔޫސް ޕްލޭން ފާސް ކުރާއިރު ގޯތި ދޭގޮތަށް ބަދަލުކޮށް ޖުމްލަ 250 ގޯތި ދެވޭވަރަށް ލޭންޑް ޔޫސް ޕްލޭން އިސްލާހުކޮށްފައި އަޅުގަނޑުމެން ފާސްކުރަނީ،" ރައީސް ވިދާޅުވި އެވެ.
އެ 250 ގޯތި ދޫކުރުމުގެ ހުއްދަ އަންނަ ހަފްތާގައި ކައުންސިލާ ހަވާލުކުރައްވާނެ ގޯއްޗަށް އެދި ހުށަހެޅުމަށް ކައުންސިލުން އަންނަ ހަފްތާގައި ހުޅުވާލާނެކަމަށް އުންމީދުކުރައްވާ ކަމަށް ވެސް ރައީސް ވިދާޅުވި އެވެ.
އޭގެ އިތުރުން އެ ރަށުގައި އެޅުމަށް ނިންމާފައިވާ 50 ހައުސިން ޔުނިޓްގެ މަޝްރޫއު މިއަހަރު ބަޔަކާ ހަވާލުކޮށް، ބާރު ސްޕީޑުގައި ގެންދަވާނެ ކަމަށް ވެސް ވިދާޅުވި އެވެ.
