ޣައްޒާ ސިޓީ އާއި ޣައްޒާގެ އަވަށްޓެރި ޖަބަލިއާގައި ނުރައްކާތެރި އިތުރު އޮޕަރޭޝަނެއް ވަރަށް އަވަހަށް ހިންގަފާނެ ކަމުގެ ސިގުނަލެއް އިސްރާއީލުން މިއަދު ދީފިއެވެ.

އިސްރާއީލުގެ ހައްދުފަހަނައެޅި ސިފައިން ވަނީ ބޮޑުވަޒީރު މުޖުރިމު ނަތަންޔާހޫގެ އޯޑަރަށް ޑްރޯން ތަކުގައި ޣައްޒާ ސިޓި އާއި ޖަބަލިޔާގެ ބައެއް ސަރަޙައްދުތައް އެކީއެކަށް ހުސްކުރުމަށް މިއަދު އިންޒާރުގެ ނޯޓުތަކެއް އަޅާފައެވެ.

ޢާންމުކޮށް މިގޮތަށް އިންޒާރުގެ ކަރުދާހެއް އަޅާނަމަ މާ ގިނަ އިރެއް ނުވެ ޔަހޫދީ އަނިޔާވެރި ޒައެނިސްޓުން އެ މީހުންގެ ޙަމަލާތައް ފަށައެވެ. އަދި ނުރައްކާތެރި ބޮޑެތި ލޭއޮހޮރުވުންތައް ހިންގުމަށް ވައިގެ މަގުން ބޮން އަޅައި ދިރިތިއްބާ ޣައްޒާ މުސްލިމުންގެ ގައިގައި ރޯކޮށްލައި ޝަހީދުކޮށްލައެވެ. މިއީ މީގެ ކުރިން ކަންތައް ކޮށްފައިވާ ގޮތެވެ.

ޚަބަރުތައް ބުނާ ގޮތުގައި ޣައްޒާ ސިޓީއާއި ޖަބާލިއާ އަށް މިއަދު ވައްޓައިލި ކަރުދާސްތަކުގައި ހައްދުފަހަނަ އެޅި ޓެރަރިސްޓު ޔަހޫދީން ދީފައިވާ އިންޒާރަކީ 9 ބްލޮކުގައި ދިރިއުޅޭ ހުރިހާ އެންމެން ވެސް ގެދޮރު ދޫކޮށް ދިޔުމަށެވެ. އެއީ ބްލޮކް ނަމްބަރު 760، 975، 976، 1805، 1812، 1813، 1814، 1815، 1816، އަދި 1818 އެވެ.

މި 9 ބުލޮކުގައި އެތައް ހާސް އާއިލާއެއް ދިރިއުޅެމުންދާއިރު، އޭގެ ތެރެއިން ގިނަ މީހުންނަކީ ހަނގުރާމަ ފެށުނު ފަހުން އެތައް ފަހަރަކު ގެދޮރު ގެއްލިފައިވާ ރެފިއުޖީންނެވެ.

ފޮޓޯގައި ރަތްކުލައިން ފާހަގަކޮށްފައި އެ ވަނީ ނުރައްކާތެރި ލޭ އޮރުވުމެއް ހިންގަފާނެ ކަމަށް ބެލެވޭ ސަރަޙައްދެވެ. ތީރެއް ކުރަހައި ދައްކާފައި އެ ވަނީ، މިދެންނެވި 9 ބުލޮކުގެ މީހުން އެމީހުންގެ ގެތައް އިސްރާއީލް ސިފައިން ބޭނުން ގޮތެއް ހެދުމަށް އެ މީހުންނަށް ދޫކޮށްލާފައި، ގެތަކުގައި ދިރިއުޅޭ މުސްލިމުން ދިޔުމަށް އިސްރާއީލު ސިފައިން އަމުރުކުރާ ދިމާއެވެ. އެއީ ޣައްޒާ ސިޓީގެ ދެކުނުގައިވާ ރެފިއުޖީ ކޭމްޕުތައް ހުންނަ ދިމާލެވެ.

ޣައްޒާގެ ދެކުނު އޮތީ މިހާރު ވެސް ގަދަކަމުން ގެދޮރުން ނެރެލާފައިވާ މުސްލިމުންނާއިގެން ތޮއްޖެހިފައެވެ. އެ ތަނުގައި އިތުރަށް ގެދޮރު ގެއްލިފައިވާ މީހުން ބައިތިއްބާނެ ޖާގައާއި ވަޞީލަތެއް ވެސް ނެތް ކަމަށް ޚަބަރުތައް ބުނެއެވެ.

އެތައް ހާސް މުސްލިމު ކުޑަކުދިންނާއި އަންހެނުންގެ ޤާތިލު ނަތަންޔާހޫގެ އަމުރަށް ހައްދުފަހަނަ އަޅަފައިވާ އޭނާގެ ޒައެނިސްޓް ޖަމާޢަތުން މި 9 ބުލޮކް ސުންނާފަތި ކޮށްލަން މިއަދު ނޯޓުތައް އެޅިއިރު އެމެރިކާ އާއި ފުރާންސުން މި ހަނގުރާމަ އާއި ގުޅުމަށް 700 މީހުން ގެނައުމަށް ނަތަންޔާހޫ ވަނީ ނިންމާފައެވެ.