ރައްޔިތުންގެ މަޖިލީހުގެ މިއަހަރުގެ ދެވަނަ ދައުރު ނިންމާލައިފި އެވެ.

ރައްޔިތުންގެ މަޖިލީހުގެ މިއަހަރުގެ ދެވަނަ ދައުރު ނިންމާލާފައިވާއިރު މަޖިލިހުގެ މިއަދުގެ ޖަލްސާގައި މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ނަމުގައި މީޑިއާތަކާއި ނޫސްވެރިކަން ރެގިއުލޭޓްކުރުމުގެ ބާރު މީޑިއާ ކޮމިޝަނަށް ލިބޭ ބިލެއް ރައްޔިތުންގެ މަޖިލީހަށް ވަނީ ހުށަހަޅައިފަ އެވެ. މިބިލުގެ ސަބަބުން މިއަދުގެ ޖަލްސާ ވަނީ "ހޫނު ފެނަށް" ވެއްޓިފަ އެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ނަމުގައި މީޑިއާތަކާއި ނޫސްވެރިކަން ރެގިއުލޭޓްކުރުމުގެ ބާރު މީޑިއާ ކޮމިޝަނަށް ލިބޭ ބިލު ރައްޔިތުންގެ މަޖިލީހަށް ހުށަހަޅާފައިވަނީ ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރެވެ.

މިއަހަރުގެ ރައްޔިތުންގެ މަޖިލީހުގެ ދެވަނަ ދައުރު ނިންމަވާލައްވަމުން މަޖިލީހުގެ ރައީސް އަބްދުރަހީމް އަބްދުﷲ ވިދާޅުވެފައިވަނީ މަޖިލީހަށް ހުށަހެޅިފައިވާ ބިލުގެ ބަހުސް މިއަދަށް ނިންމާލަން ގަސްތުކުރައްވާކަމަށެވެ. މި ބިލު އިތުރަށް ދިރާސާކުރުމަށް ފުރުސަތު ދިނުމަށާއި، މެންބަރުންނަށް ބިލާ ގުޅޭގޮތުން ހަގީގަތުގެ މައްޗަށް ބިނާކޮށް ފުންކޮށް ވިސްނައި، މަޝްވަރާކުރުމަށް ވަގުތު ދިނުމުގެ ގޮތުން، މިއަދުގެ ޖަލްސާގައި މި ބިލުގެ ބަހުސް ނިންމާލުމަށް ނިންމާފައިވާ ކަމަށް އަބްދުއްރަހީމް ވިދާޅުވި އެވެ.

އަބްދުއްރަހީމް ވަނީ މަޖިލީހުގެ މިދައުރުގައި ކުރެވުނު މަސައްކަތްތަކުގެ ތަފްސީލަށް ވެސް އަލިއަޅުއްވާލައްވައިފަ އެވެ. އެގޮތުން މި ދައުރުގައި 6 ބިލެއްގެ މަސައްކަތް ނިންމައި ފާސްކޮށްފައިވާކަމަށް އަބްދުއްރަހީމް ވިދާޅުވި އެވެ. އެބިލުތަކަކީ:

1. ތެލެސީމިއާ ކޮންޓްރޯލްކުރުމުގެ ގާނޫނަށް ގެނައި އިސްލާހު
2. ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަށް ގާނޫނަށް ގެނައި އިސްލާހު
3. ފެނާއި ނަރުދަމާގެ ގާނޫނަށް ގެނައި އިސްލާހު
4. މޯލްޑިވްސް އެންޓެލެކްޗުއަލް ޕްރޮޕަޓީ އޮފީހުގެ ބިލު
5. އިންޝުއަރެންސް ބިލު
6. ގައުމީ ޕޭމަންޓް ސިސްޓަމްގެ ގާނޫނަށް ގެނައި އިސްލާހު

މިއަދު ބަހުސްކުރެވިގެން ދިޔައީ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ނަމުގައި މީޑިއާތަކާއި ނޫސްވެރިކަން ރެގިއުލޭޓްކުރުމުގެ ބާރު މީޑިއާ ކޮމިޝަނަށް ލިބޭ ބިލަށެވެ.

ރައްޔިތުންގެ މަޖިލީހުގެ މި ދައުރުގެ މުއްދަތު މި މަހުގެ 21ގެ ނިޔަލަށް ދަންމާލަން މަޖިލީހުން މީގެކުރިން ވަނީ ފާސްކޮށްފަ އެވެ. އެހެންނަމަވެސް މަޖިލީހުގެ ގަވާއިދު ބުނާ ގޮތުން، މި މަހުގެ 15 ވަނަ ދުވަހަށް މި ދައުރު ނިމޭނެ އެވެ.