ސިވިލް ސާވިސް ކޮމިޝަން (ސީއެސްސީ)ގެ މެންބަރުކަމަށް އައްޔަނުކުރަން، ހަ ބޭފުޅެއްގެ ނަން ރައްޔިތުންގެ މަޖިލީހަށް ހުށަހަޅައިފި އެވެ.

ސިވިލް ސާވިސް ކޮމިޝަނުގެ މެމްބަރުކަމަށް އައްޔަނުކުރަން، ހަ ބޭފުޅެއްގެ ނަން މަޖިލީހަށް ހުށަހަޅުއްވާފައި މިވަނީ ސީއެސްސީގެ ތިން މެންބަރެއްގެ ދައުރުގެ މުއްދަތު މިއަހަރުގެ ސެޕްޓެމްބަރު މަހުގެ ތިން ވަނަ ދުވަހަށް ހަމަވާތީ އެވެ. ސީއެސްސީގެ މެމްބަރު ކަމަށް ކުރިމަތިލެއްވި ފަރާތްތަކުގެ ތެރެއިން، ރައީސުލްޖުމްހޫރިއްޔާއަށް ފެނިވަަޑައިގެންނެވި ހަ ބޭފުޅެއްގެ ނަންތައް މަޖިލީހަށް މިއަދު ވަނީ ފޮނުއްވައިފަ އެވެ.

ރައީސް މަޖިލީހަށް ފޮނުއްވި ހަ ބޭފުޅުންގެ ނަންތަކަކީ:

1. މުހައްމަދު ނާސިހް
2. ޑރ. ހުސައިން ފާއިޒް
3. ޑރ. ދީބާ މުސާ
4. ބަދުރިއްޔާ މުސާ
5. ޑރ. ފާތިމަތު މުނާ
6. އާމިނަތު އުއްމުކުލްސޫމް

މި ނަންތައް ދިރާސާ ކުރުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް މިހާރު ވަނީ ފޮނުވައިފަ އެވެ.

ނާސިހު އިތުރު ދައުރަކަށް އައްޔަން ކުރަން ރައިސް ފޮނުއްވާފައިވާއިރު، އޭނާއަކީ މިވަގުތުވެސް ސީއެސްސީގެ ރައީސްކަމުގެ މަގާމުގައި ހުންނެވި ބޭފުޅާ އެވެ. ސިވިލް ސާވިސް ކޮމިޝަނަށް މެންބަރުން އައްޔަން ކުރަނީ ފަސް އަހަރުގެ މުއްދަތަކަށެވެ.

ސިވިލް ސާވިސް ކޮމިޝަނުގެ މެންބަރުންގެ ގޮތުގައި މިހާރު ތިއްބަވާ ބޭފުޅުންނަކީ މުހައްމަދު ނާސިހް، މުހައްމަދު މުޖްތާޒް، މުހައްމަދު ފަރުސަތު، ފާތިމަތު ޝަރީފްގެ އިތުރުން ފާތިމަތު ހަބީބާ އެވެ.