ރައްޔިތުން ނުކުމެ ހަޅުތާލު ކުރާތީ އިސްރާއީލް ހުއްޓުމަކަށް އައިސްފި

ރަހީނުކޮށްފައިވާ މީހުން ދޫކޮށްލުމާއި ބޮޑުވަޒީރު ނަތަންޔާހޫ އިސްތިއުފާ ދިނުމާއި ޣައްޒާ ހަނގުރާމަ ނިމުމަކަށް ގެނައުމަށް އެދި އިއްޔެއިން ފެށިގެން އެތައް މިލިއަން ބަޔަކު އިސްރާއީލުގެ މަގުތަކަށް ނުކުމެ ކުރިޔަށް ގެންދާ މުޒާހަރާ ތަކާއި ގުޅިގެން އިސްރާއީލް ހުއްޓުމަކަށް އައިސް މުޅި އިސްރާއީލް ހައި އެލާޓަށް އައިސްފިއެވެ.

^{މުޒާހަރާގެ ބައިވެރިން އިސްރާއީލުގެ މަގެއްގެ މަތީގައި ރޯކޮށްލާފައި. ގާތްގަނޑަކަށް ހުރިހާ ބޮޑެތި މަގުތަކުގެ ކޮންޓުރޯލް އޮތީ މުޒާހަރާގެ ބައިވެރިންގެ އަތުގައި.}

އިދިކޮޅު ފަރާތްތަކާއި ވަކި ޕާޓީއަކަށް ނިސްބަތްނުވާ ރައްޔިތުން ހިމެނޭ ގޮތަށް ވެރިރަށް ޓެލް އަވީވް އިން ފެށިގެން ޣައްޒާ ބޯޑަރާއި ހަމައަށް ހުރިހާ މަގުތަކެއްގައި ކަހަލަ ގޮތަކަށް މި ވަގުތުވެސް ދަނީ މުޒާހަރާ ކުރަމުން ކަމަށް އިސްރާއީލްގެ ޗެނަލްތަކުން ބުނެއެވެ.

ފަލަސްޠީނު ބިމަށް ވެރިވެގަނެގެން އުޅޭ ޔަހޫދީ ރައްޔިތުން އިއްޔެ އާއި ރޭ ވެސް މަގުތަކުގައި އަލިފާން ރޯކޮށް، ޓަޔަރު އަންދައި ނަތަންޔާހޫގެ އިސްތިއުފާ އަށް ގޮވާފައިވާއިރު އަދިވެސް މުޒާހަރާތައް ދަނީ ކުރިޔަށެވެ.

^{އިސްރާއީލުގެ މަގުތަކުގައި ރޭ ފަންވަރު މުޒާހަރާގެ ބައިވެރިން - އިއްޔެއިން ފެށިގެން އިސްރާއީލުގައި މުޒާހަރާތައް ދަނީ ކުރިޔަށް. ރައްޔިތުން ގޮވަމުން ދަނީ ނަތަންޔާހޫ އިސްތިއުފާ ދިނުމަށާއި ޣައްޒާ ހަނގުރާމަ ހުއްޓާލައި ރަހީނުން މިނިވަން ކުރުމަށް.}

މިއީ ފަހުގެ ތާޚުހުގައި އިސްރާއީލުހައި ސަރުކާރާއި ދެކޮޅަށް ބާއްވާ އެންމެ ބޮޑު އެއްވުން ކަމަށް ވާއިރު އިސްރާއީލުގެ ސިފައިންގެ އަތެއްވެސް މި ހަޅުތާލުތަކުގައި އެބައޮތް ކަމަށް ތުހުމަތު ކުރެއެވެ.

މުޒާހަރާގެ ބައިވެރިން ވަނީ ބޮޑެތި ހައިވޭތައްވެސް ބަންދު ކޮށްފައެވެ. އެއާއި އެކު ސްކޫލްތަކާއި ސަރުކާރުގެ ބައެއް އޮފީސްތަކާއި ޒަރޫރީ ޚިދުމަތްދޭ ތަންތަން ވަނީ ބަންދުކޮށްފައެވެ.

އިސްރާއީލުގެ އެތައް ސަތޭކަ ތަނެއްގައި އެއްވުންތައް ހުއްޓުމެއް ނެތި ކުރިޔަށްދާއިރު ވެރިރަށް ޓެލް އަވީވްގައި އެކަނި ވެސް ގާތްގަނޑަކަށް 500،000 މީހުން ދަނީ މުޒާހަރާ ކުރަމުންނެވެ.

^{އިސްރާއީލުގެ ބާރުތަކުން މުޒާހަރާގެ ބައިވެރިޔަކު ހައްޔަރުކޮށްގެން ގެންދަނީ}

އިސްރާއީލުގައި މިހާރު ކުރިޔަށްދާ މުޒާހަރާތައް ހުއްޓުވުމަށް ބޮޑުވަޒީރު ނަތަންޔާހޫ ދަނީ ރަޔަޓް ފުލުހުންނާއި ސިފައިންގެ ޔުނިޓްތައް މަގުމައްޗަށް ނެރެ ހަމަނުޖެހުން ކޮންޓްރޯލް ކުރެވޭޭތޯ މަސައްކަތް ކުރަމުންނެވެ. މިހާތަނަށް 40 ވަރަކަށް މީހުން ވަނީ ހައްޔަރު ވެސް ކޮށްފައި ކަމަށް ޚަބަރު ލިބެއެވެ.