ޕާކިސްތާނަށް ބޯކޮށް ވާރެވެހި، އެ ގައުމުގައި ހިނގި ފެންބޮޑުވުމުގެ ހާދިސާގައި ގިނަ އަދަދެއްގެ މީހުން މަރުވެ، ބޮޑެތި ގެއްލުންތަކެއް ލިބުމާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ތައުޒިޔާ ފޮނުވައިފި އެވެ. އެ މަނިކުފާނު މި ތަޢުޒިޔާ ވިދާޅުވެފައިވަނީ އެކްސްގައި ކުރެއްވި ޕޯސްޓެއްގަ އެވެ.
މި ހިތާމަވެރި ހާދިސާގައި ގެއްލުން ލިބުނު މީހުންނަށް ހަމްދަރުދީ ފާޅުކުރައްވަމުން، އެ ހާދިސާގައި މަރުވި މީހުންގެ އާއިލާތަކަށް، ދިވެހިސަރުކާރާއި ދިވެހި ރައްޔިތުންގެ ނަމުގައި އެ މަނިކުފާނު ވަނީ ތައުޒިޔާ ވިދާޅުވެފަ އެވެ.
ޕާކިސްތާނަށް މި ކުރިމަތިވެފައިވާ ހިތާމަވެރި ދަނޑިވަޅުގައި، ދިވެހިރާއްޖެ ވަނީ އެ ގައުމުގެ ސަރުކާރާއި، އެ ގައުމުގެ އުހުވަތްތެރި ރައްޔިތުންނާ އެކުގައިކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
